BAUKAU, STLTIMORLESTE.com – Fulan Janeiru tinan nee, Komando Polisia Munisipiu Baukau rejistu kazu insidente no asidente hamutuk 56.
Informasaun nee relata husi Komandante Interinu Polisia Munisipiu Baukau, Superintendente João Sancho Pires ba STL iha nia knaar fatin Vila Nova, Baukau, Kuarta (05/02/2025).
“Iha Baukau kona-ba insidente nian iha Janeiru akontese 43 kazu, kona-ba kazu trafiku asidente nian nee iha 13,” dehan nia.
Komandante Interinu nee esplika, kazu insidente neebe rejistu 43 ho numeru aas mak Violensia Domestika neebe involve husi Xefe uma kain sira, tanba kauza husi utilizasaun media sosial hanesan Facebook, WhatsApp no seluk tan.
Maibe Komando Polisia Munisipiu Baukau liu husi ekipa investigasaun no VPU konsege rejistu iha Ministeriu Publiku, tanba nee konsidera krimi.
Enkuantu asidente trafiku neebe rejistu hamutuk 13, tanba kauza husi motorista konduz motoridaza ho velosidade neebe lakon kontrolu, maibe husi kazu 13 rejistu deit nain 1 mak lakon vida iha area Ponte Wailakama, Postu Administrativu Vemasi, restu seluk hetan kanek kmaan.
Nia fundamenta, atu minimiza liu tan kazu insidente no asidente hamutuk 56 refere, Komando Polisia Munisipiu Baukau hamutuk ho ekipa hotu planeia ona atu halo sosializasaun iha nivel suku.
“Ita agora prepara hela VPU, investigasaun hamutuk ho Polisia Komunitariu inklui tranzitu siensibiliza iha suku iha tinan nee koalia konaba violensia bazeia ba jeneru no tranzitu nian,” João akresenta.
Komandante interinu nee informa, relasiona ho asidente neebe kontinua akontese, Komando Polisia Munisipiu Baukau iha loron 05 Fevereiru nee, hahu destaka ona membru tranzitu akompanha membru husi Seksaun seluk iha estrada publiku diresaun Vila Nova-Vila Antiga atu kontrolu movimentu rodaviariu liu-liu prevene irregularidade hanesan motorista sira la uza kapasete no asesoria motor no karreta hanesan la monta sapa matrikula no espelu.
Nia argumenta, destaka membru sira iha estrada publiku atu hatudu ba publiku katak, prezensa Polisia Baukau kontinua iha terrenu atua kualker situsaun.
(EST 2)
