DILI, STLTIMORLESTE.com – Governu Japaun ho Fundu Nasoens Unidas ba Labarik (UNICEF) entrega tablet komputador 98 no router 84 ba Ministeriu Saude (MS), hodi habelar teknolojia saude dijital iha Sentru Saude Komunitaria no Servisu Saude Munisípiu sira iha Timor Leste(TL).
Visi Xefe Misaun Embaixada Japaun iha Timor Leste, Yuki Sakai hatete, Governu Japaun ho UNICEF ofisialmente entrega tablet komputador 98 no router 84 ba Ministeriu Saude (MS), hodi habelar teknolojia saude dijital iha Sentru Saude Komunitaria 73 no Servisu Saude iha munisípiu 14 iha Timor-Leste.
“Projetu nee finansia husi Governu Japaun no implementa husi UNICEF, ho objetivu atu hasae sistema saude dijital iha Timor Leste. Espesifikamente projetu ida nee envolve fornesimentu ekipamentu informatiku ka IT nian, hanesan tablet no router, hodi estabelese sistema ida neebe metin ba jestaun dijital informasaun vasinasaun nian,” hatete Yuki Sakai liu husi nia diskursu, iha salaun Palasiu da Sinzas Ministeriu Saude (MS), Kaikoli, Dili, Tersa (05/11/2024).
Nia esplika, dijitalizasaun iha papel importante iha kuidadu saude modernu, introdusaun teknolojia dijital laos deit transforma jestaun dadus, maibe mos iha potensial atu hadia ho signifikativu kualidade servisu kuidadu saude nian.
“Hau fiar katak, akumulasaun dadus saude nian neebe oin-oin ho kualidade aas iha nasaun tomak sei kontribui ba prevensaun moras, diagnostiku lalais, no realizasaun medisina personalizada, enkuantu mos permite planeamentu polítika nasional neebe efetivu liu,” nia informa.
Iha fatin hanesan, Ofisial Responsavel ba UNICEF iha Timor Leste, Cheah Yew Hee agradese ba Embaixador Japaun ba Timor Leste, ba sira nia apoiu jenerozu hodi harii sistema saude lokal liu husi mellora kapasidade no ekipamentu sira iha nivel sub-nasional. Dijitalizasaun dadus saude nian nee, sei ajuda jere dadus ho efisiensia no halakon sistema bazeia ba surat tahan.
(jen)
