DILI, STLTIMORLESTE.com – Jardim Motael neebe lokaliza iha tasi ibun sidade Dili nian, kontinua sai destinu prinsipal ba vizitante ka komunidade sira hodi buka hakmatek no halao atividade rekreasaun nian iha tempu loraik.
Tuir observasaun jornalista STL iha terenu haree katak, hahu husi tuku 16:00 loraik, vizitante sira neebe mai husi grupu oin-oin hahu nakonu iha area jardm laran no mos iha tasi ninin sira.
Vizitante sira neebe mai jardim Motael laos deit hodi tur, maibe mos halao atividade oin-oin neebe produtiva, balun hili atu halai (Jogging) no lao ain iha pasadiu jardim nian no atividade seluk tan.
“Ami mai iha nee kuaze loron-loron depois remata servisu. Anin fresku no bele haree loro matan monu, neebe kapas tebes husi nee,” dehan vizitante, Mario dos Santos ba jornalista STL iha jardim Motael, Dili, Sabadu ( 28/02/2026).
Vizitante nee mos hein katak seguransa iha area jardim Motael bele reforsa liu tan husi autoridade kompetente sira, atu nunee vizitante sira bele goza sira nia tempu loraik ho fuan neebe hakmatek no seguru.
Aleinde nee jardim Motael mos sai fatin favoritu familia sira hodi lori labarik sira ba halimar. Situasaun nee fo mos impaktu pozitivu ba ekonomia lokal, liu-liu ba negosiante kiik sira neebe faan ayam potong tunu, kafe, ai fuan no seluk tan iha area neeba.
Vendador Madalena Magno relata katak, sira nia rendimentu aumenta liu.tan iha tempu loraik, tanba vizitante neebe barak liu fali iha tempu dader ka loron manas.
Nia mos husu ba vizitante sira atu labele soe foer arbiru ba tasi laran ka iha jardim laran, nunee fatin nee nafatin moos no furak iha ema nia matan.
(car)
