DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” destaka pontu lima hodi melhora no dezenvolve institusaun F-FDTL sai profisionál liu tan iha futuru.
“Nuudar Xefe Estadu Maior Jenerál, hau apela ba lideransa, hahu husi Komandante Komponente no Unidade sira no Xefe Divizaun sira hotu atu foti medida estratéjiku lima tuir mai, ida integrasaun kompleta, rua modernizasaun institusionál, tolu rekrutamentu bazeia ba méritu, haat formasaun profisional no responsabilidade ka prestasaun kontas,” hateten Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” ba jornalista sira iha nia intervensaun, bainhira abertura ba serimónia palestra husi seksaun jéneru nian bá kursu formasaun Kapitaun neebe halao iha Kuartel Jerál F-FDTL Fatuhada, Dili, Sesta (14/11/2025).
Nia esplika, integrasaun kompleta nee haree liu ba espesialidade militár hotu-hotu nakloke ba feto bazeia ba méritu no programa mentorizasaun ba ofisiál feto sira.
Nia deklara, modernizasaun institusionál nee liga ba reforma ba instalasaun militár sira ba alojamentu inkluzivu, implementasaun kódigu konduta neebe metin hasoru asédiu no diskriminasaun asegura mekanizmu relatóriu ho transparénsia.
Nia informa, atu dezenvolve no melhora diak institusaun F-FDTL sai forsa neebe profisionál presiza rekrutamentu bazeia ba méritu, halakon bareira sira neebe la nesesáriu neebe esklui feto avaliasaun fíziku sira neebe reflete ezijensia operasional lejítimu sira, laos estereótipu.
Nia akresenta, formasaun profisionál sai mós pontu importante ba dezenvolvimentu institusionál, liu-liu oinsá atu profisionaliza militár sira, integrasaun edukasaun jeneru iha kursu lideransa nian. Treinamentu ba ofisial sira atu lidera ekipa sira ne’ebé heterojeneu.
Nia tenik, responsabilidade ka prestasaun kontas sai importante ba melhoramentu iha instituisaun F-FDTL, tanba metrika progresu neebe klaru atu relata tinan-tinan. Avaliasaun sira komandante nian neebe liga ba lideransa inkluzivu.
“Iha tinan lima oin mai, ita sei harii F-FDTL ida ne’ebé diferente, la’ós tanba ita abandona valór fundamentál sira, korajen no disipliña nian, maibé tanba ita rekonhese katak valór sira ne’e serbí di’ak liu, bainhira nasaun tomak bele kontribui”, nia afirma.
Tenente Jenerál Falur hateten, FALINTIL – Forsa Defeza Timor Leste nian sei sai salvaguarda ba igualdade jéneru.” Laos tanba impozisaun esterna, maibé tanba ita rekonhese katak igualdade jéneru labele haketak husi instituisaun militar ida neebe jenuinu, modernu, profisionalizadu no dignu ba Timor Leste”, nia afirma.
Jornalista: Jeniche da Costa
Editor: Xisto Mendonça
