DILI, STLTIMORLESTE.com – Xefe Estadu Maiór Jenerál FALINTIL – Forsa Defeza Timor Leste (F-FDTL), Tenente Jenerál Domingos Raul “Falur Rate Laek”, seidauk simu informasaun kona-ba deskonfia membru F-FDTL ida lori nia maun alin sira bairu laran baku lisuk sidadaun ho naran Paulino da Costa, iha área Taibesi, Sabadu foin lalais nee.
Nia dehan, membru F-FDTL sira iha regra bainhira atu halo intervensaun nee sira hatene tanba treinu sira, prepara sira, hanorin sira iha kazu sivíl no kazu dez-orden publiku.
Nia tenik, sira nee hatene bainhira mak sira atu intervein, atu intervein tanba saida no oinsa ho uza meius saida sira hatene. Neebe agora depende ba prosesu investigasaun disiplinár atu haree nia sala iha neebe no nia loos iha parte neebe.
“Hau seidauk simu informasaun, maibe normalmente hanesan kazu krimi sira, violasaun sira nee sempre iha, maibe ita iha regra hodi aplika ba ida nee, orsida ba justisa mak bele hateten problema nee nia kauza. Hau husu atu haree didiak ema nee halo saida,” hatete Tenente Jenerál Domingos Raul “Falur Rate Laek ba jornalista sira iha Kuartel Jeneral F-FDTL Fatuhada, Dili, Kuarta (26/03/2025).
Tenente Jenerál Falur Rate Laek nee esplika, pesoal F-FDTL konsumu tua nee erru ida, depois hamutuk tan ho joven sira mak sai tiha problema hanesan nee entaun nia kauza loloos mak saida ida, nia viola regra nee oinsa, kauza prinsipal nee saida mak halo uluk, tanba buat ida lanu nee mos militár nia regra iha katak, labele lanu depois baku nee mos regra iha katak la bele baku tanba nee militár mos iha regra no regulamentu disiplina.
“Nia viola ida nee, entaun kastigu tuir nia regra, nunee kastigu mínimu loron hitu (7) too detensaun iha prizaun ate too tempu neebe separasaun servisu,” nia deklara .
Iha fatin ketak, fontes konfirmadu esplika, akontesimentu husi sasin sira neebe husu atu labele publika sira nia identidade katak, iha Sabadu dadeer, haleu tuku 08:30 OTL, Paulino da Costa sai husi uma, Aldeia Correio, Suku Lahane Osidentál, Postu Administrativu Vera Cruz, liu ba ajuda nia bainhira sira halo dapur iha Taibesi.
Sira halo konstrusaun dapur, Vitima Paulino da Costa mos konsumu tua oituan, depois iha tuku 12:30 kalan, Paulino da Costa sai husi nia banin sira ho ninia motorizada atu fila-fali ba nia rezidensia hodi deskansa.
Nia hatutan, too iha kruzamentu ida, dalan fahe malu liman loos nian neebe atu ba mosu iha ponte My Friend, iha liman karuk atu mosu ba Xina Rate, molok atu too iha kruzamentu vítima soke asu ida iha kedas membru F-FDTL nee ninia portaun nia oin hodi rezulta vitima Paulino da Costa monu ho motorizada.
“Ita haree Paulino da Costa hamriik no hiit fila-fali ninia motorizada, hodi hasai mos liafuan ladun diak ka “tolok” ba asu nee katak, se nia asu mak nain lakohi sulan. Iha tempu nee kedas, membru F-FDTL ho diviza ofisial ho inisial J neebe kalan nee mos tuur hemu hela tua ho nia kolega sira iha arredores uma nian no pesoal F-FDTL nee mos sai mai ho nia kolega sira haree vítima neebe soke asu, membru F-FDTL ho nia maluk sira husu ba vítima katak o hela iha neebe? Ho nunee, vítima mós hatan katak, nia hela iha Lahane Korreiu. Entaun ofisiál F-FDTL mos husu ba vítima o tolok se. Vítima hatan katak laos tolok maun, maibe tolok asu neebe mak ohin halai korta hodi rezulta nia monu ho motor,” nia deklara.
Entretantu informasaun neebe STL rekolha iha terenu katak, iha loron Sabadu (22/03/2025), membru ida husi F-FDTL ho grupu joven sira iha bairu laran baku lisuk sidadaun ida ho naran Paulino da Costa, iha area Taibesi.
(jen)
