DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” hatete, kona-ba forsa tarefa konjunta neebe la konsege halo misaun umanitária iha Filipina, nee desizaun. Polítika Governu nian husi parte Komando F-FDTL tenke bsubmete.
“Agora nee desizaun polítika, neebe ita labele koalia buat ida. Ita boot sira haree stetmentu husi Ministru Negósiu Estranjeiru halo tiha konferénsia imprensa no Ministru Defeza halo tiha ona klarifiksaun, nia rezultadu mak nee. Agora Militár nee ezekutór, hein deit saida mak sira fó mai ita halo, ne’e ita halo deit”, hatete Xefe Estadu Maiór Jenerál Forsa Armada (XEMGFA), Tenente Jenerál Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Sesta (14/11/2025).
Fo hanoin fali katak iha loron iha kuarta (6/11) semana kotuk liu husi reuniaun Konselhu Ministru estraordináriu aprova projetu Rezolusaun Governu neebe autoriza, iha kuadru konstitusionál no legál, partisipasaun husi FALINTIL – Forsa Defeza Timor Leste (F-FDTL) iha misaun ida ba apoiu umanitáriu no protesaun sivíl iha Repúblika Filipinas. Desizaun governu nian bazeia ba kompromisu internasionál neebe Timor Leste halo iha ámbitu Nasoins Unidas no Asosiasaun Nasoins Sudeste Aziátiku (ASEAN) no mós dispozisoins husi Lei Defeza Nasional no Estatutu Orgániku F-FDTL nian, neebe fó lejitimidade ba Forsas Armadas hodi partisipa iha misaun umanitária no emerjénsia sira, iha kooperasaun ho nasaun sira seluk no organizasaun internasionál sira.
Nunee iha loron Tersa (11/11) foin lalais nee liu husi parada militár jeral, Governu halo serimónia despedida ba kontinente forsa tarefa konjunta na’in 150 neebe sei halo misaun umanitária iha Filipina.
No tuir planu kontinente forsa tarefa konjunta nain 150 neebe halo misaun umanitária iha Filipina sei aranka ba Filipina, iha Sesta 14-15 Novembru 2025, maibe la konsege.
Jornalista: Jeniche da Costa
Editor: Xisto Mendonça
