DILI, STLTIMORLESTE.com – Publiku balu preokupa kona-ba komisariu nia knaar iha Komisaun Anti Korupsaun (KAK), tanba nee Komisariu KAK, Rui Pereira deklara katak, halao knaar iha KAK atu jere instituisaun nee sai independente no imparsial.
“Komisariu simu pose iha Parlamentu Nasional mai iha KAK nee atu jere instituisaun kAK nee hanesan Instituisaun ida neebe independente no imparsial halao servisu no komisariu kumpri ba lei,” dehan Komisariu KAK, Rui Pereira ba jornalista sira iha MENEK, Dili, Tersa (18/03/2025).
Nia hatutan, poder komisariu nee limitadu no poder boot liu nee Ministeriu Publiku sira delegasaun tun husi Ministeriu Publiku mai prazu termina halao investigasaun submete ba iha Ministeriu Publiku atu lori ba iha Tribunal.
KAK investiga kazu sira tuir provas, labele rona deit informasaun, maibe informasaun sira neebe espalha iha publiku no publiku kestiona KAK presiza halo intervensaun.
Ezemplu kazu sira hanesan iha Agrikultura, UNTL, SERVE iha Ministeriu sira neebe funsionariu balu komete infrasaun, maibe fila fali ba iha investigasaun, se hatudu provas sufisiente haruka ba iha Ministeriu Publiku hodi lori ba iha Tribunal, se provas la sufisiente keixa sira ho odiu malu se investiga provas la iha halo konkluzaun ba iha MP katak, ida nee provas la iha tanba dun matak. Tanba nee KAK rona haree prosesu, provas maka sei termina.
Iha fatin hanesan, Diretora JSMP, Ana Paula Marsal dehan, Komisariu KAK tenke independente, tanba iha lei rasik preve klaru.
“Komisaun Anti Korupsaun tenke independente iha lei rasik preve klaru tebes kona-ba ida nee, iha UNCAC mos ita haree katak buat ida independente nee nafatin iha,” dehan nia.
(ter)
