DILI, STLTIMORLESTE.com – Domingu Ramos Selebra Jesus tama iha Jerusalem ema hotu hakilar Nia ho lian makaas hosana David oan, husi lian makaas nee iha neeba halo sidade Jerusalem sai sidade ida neebe mak Santu, sai sidade Maromak nian.
“Ita selebra Jesus iha Jerusalem, wainhira nia tama iha Jerusalem ema hotu halo Nia hanesan liurai, sira hotu-hotu hakilar ho lian ida deit, hosana David nia oan, husi sira nia hakilar ida nee iha neeba halo sidade Jerusalem sai sidade ida neebe mak Santu, sai sidade neebe mak Maromak nian, Jerusalem los duni sai hanesan sidade boot ida nakonu signifikadu sai simbolu hanesan sentru ba espiritualidade ba fiar nian, tanba sidade santu fatin fiar nian, tanba Maromak nia tempu iha neeba sai mos fatin realizasaun Maromak nia planu salvasaun nian,” hatete Administrador Parokia São José Aimutin, Pe. Helio Castro Alves, CMF liu husi nia omilia, wainhira prezide misa iha Igreja Aimutin, Domingu nee (13/04/2025).
Pe. Helio esplika, Jerusalem mos sai simbolu reinu Maromak nian, wainhira Jesus tama hanesan liurai, Nia tama laos liurai mundu nian, maibe Nia tama Jerusalem hanesan liurai lalehan nian, liurai ida ba Maromak nia reinu, Jerusalem mos sai simbolu lia los prevensaun nian iha biblia liu-liu revelasaun haktuir katak Jerusalem sidade lalehan perfeitu, katak sidade Jerusalem sai Maromak nia sidade neebe nakonu ho buat diak, Jerusalem mos sai simbolu sofre no sakrifisiu, Jerusalem sentidu nakukun hanesan sidade terus no mate iha neeba, sai mos simbolu luta sakrifisiu no terus neebe mak tenke ultra pasa ba iha mundu atu hetan salvasaun.
Jerusalem mos sai simbolu esperansa renovasaun, katak mundu neebe hetan nakonu ho pekadu no mundu neebe mak nakonu hahalok aat, iha neeba Jerusalem iha esperansa nomos iha renovasaun atu sidade bele hetan santidade fatin neebe Maromak halo no moris hamutuk ho nia ema sira livre husi pekadu neeba.
“Ohin ita tama iha ita nia sidade Jerusalem Aimutin, iha neeba ohin sarani sira idak-idak hiit ninia ramos, labariik sira hakilar babadok lian iha mos tau kultura, iha neeba hatudu katak ita simu Jesus hanesan simbolu ida atu ita hanoin hikas oinsa Jesus nee tama hanesan liurai laos liurai mundu nian, maibe hanesan liurai lalehan, ida nee hatudu mai ita katak ita nia hakilar ema Judeu nia hakilar hosana David oan ikus mai ohin rona iha evanjeliu hakilar nakfilak tiha ba hedi nia ba kruz oho nia, oho nia, ida nee mak mundu nia hakarak atu saran Jesus iha mate,” katak Pe. Helio.
Tan nee leitura sira lori ema ba iha Jerusalem, liu-liu leitura sira ohin lori ita atu bele reflete no tama iha semana Santa neebe nakonu ho domin no sakrifisiu, katak iha neeba deskreve kona-ba Jesus Maromak Oan neebe haraik aan terus nia fedelidade no obedensia ba Maromak.
Tuir observasaun STL iha Igreja Aimutin, Padre sei fo bensa ba ramos neebe sarani sira lori, depois de bensaun padre hamutuk ho sarani ho prosesaun husi igreja oin ba iha iha igreja laran neebe akompanha tebedai husi labariik sira nomos hananu no halao prosesaun.
Iha misa Domingu Ramos nee partisipa husi madre no sarani sira barak halo igreja laran no liur nakonu, balun hamriik iha estrada ninin hodi tuir misa, maske sarani barak sena malu sente manas maibe ho hakmatek no orasaun too misa remata.
(joa)
