DILI, STLTIMORLESTE.com – Jurista Timoroan konsidera jestaun administrasaun justisa iha Tribunal ladun efetivu, presiza halo revizaun ba lei balu atu prosesu neebe simples bele mai ho Juiz Singular.
“Halo ona revizaun ba lei atu nia implikasaun mos labele ba iha prosesu pendente, tanba laos falta rekursu umanu, maibe jestaun no administrasaun ba justisa ladun efetiva, hodi halo prosesu pendente,” dehan Jurista Sergio Dias Quintas ba STL, iha Tribunal Dili, Tersa (04/03/2025).
Nia hatutan, bele aumenta tan numeru Majistradu, maibe la halo jestaun ba iha rekursu umanus ho diak, no la haree kona-ba reforma lejislasaun sira, mak problema sei akontese nafatin.
Governu ida agora iha politika ida no harii gabinete ida, atu haree kona-ba reforma setor justisa, no sira iha gabinete nee mak tenke haree ho didiak, se krimi kiik simples neebe la nesesariu hodi julga ho Tribunal koletiva, halo revizaun ba lei nee.
Iha fatin ketak, Prezidente Tribunal Rekursu, Deolindo Dos Santos dehan, husi parte Konselhu Superior Majislatura Judisial (KSMJ) mos preokupa ho ida nee hodi haruka ona proposta ida ba iha Parlamentu Nasional.
“Haruka ona proposta ba Parlamentu Nasional atu altera buat sira neebe la justifika koletivu, ami husu pelu menus koletivu, karik husi tinan 8 ba leten husi tinan 8 mai kraik nee Juiz ida deit ona, tanba la iha razaun mantein nafatin ho Juiz nain tolu ba tur iha neeba ho kazu simples, Juiz Prezidente mak husu deit pergunats seluk la husu tan,” ddehan PTR, Deolindo.
(ter)
