BALIBO, STLTIMORLESTE.com — Jestor Postu Administrativu Balibo, Casímiro dos Santos hatoo sentimentu orgulhu ba Sekretaria Estadu Komunikasaun Sosial (SEKOMS) no Konselhu Imprensa (KI), tanba kada tinan komemora loron trajedia Balibo Five ba jornalista nain 5 nia mate defende lia loos iha Timor Leste (TL).
“Hau sente orgulhu tanba komemorasaun tinan 50 trajedia Balibo Five fanu ita relembra fila fali jornalista nain 5 neebe mak mate iha Balibo Five, iha loron 17 Outubru 1975, hau sente orgulhu tanba tinan-tinan Sekretariu Estadu komunikasaun Sosial nomos Konselhu Imprensa sempre komemora loron Balibo Five, ita hotu fo ondra ba sira tanba sira luta ba lia loos,” dehan Jestor Administrador Postu Administrativu Balibo, Casímiro dos Santos ba jornalista sira iha Balibo, hafoin inaugura Radio Komunidade Fronteira Balibo Five, Kuarta (15/10/2025).
Casimiro haktuir, molok komemorasaun Balibo Five ba dala 50 nee, SEKOMS ho KI realiza ona reuniaun ho Autoridade Postu Balibo, ohin hatudu rezultadu neebe diak tebes, komunidade Balibo sente haksolok no sente katak loron nee nain ba Balibo oan liu-liu populasaun Munisipiu Bobonaro tomak.
“Ami ho SEKOMS koopera malu ho diak tanba SEKOMS mos oferese ona Radio Komunidade Balibo Five neebe ami asina ona kontratu loron hira liu ba, agora daudaun finaliza ona konstrusaun ba Radio nee no loraik nee inaugura Rádio Komunidade Fronteira Balibo Five,” afirma Administrador Balibo.
Iha biban nee, nia husu ba SEKOMS no KI atu kontinua koopera nafatin eventu nee iha tinan oin, ho autoridade lokal sira atu povu ativu diak liu tan.
observasaun Administrador Postu Balibo iha eventu komemorasaun Balibo Five lao susesu, tanba kolaborasaun diak ho autoridade no komunidade tomak iha Postu Balibo, tan nee hatoo apresiasaun boot ba SEKOMS no KI tanba bele iha kooperasaun neebe diak ikus hatudu rezultadu neebe diak iha tinan ida nee.
“Hau atu konta oituan istoria katak, iha tempu Indonezia, Balibo naran monu tanba asina deklarasaun integrasaun ilegal nee iha Bali, sira aumenta deit liafuan bo ho naran Balibo, dehan fatin nee mak lori integrasaun ba TL. Ohin loron ita independensia ona, naran Balibo nee krimi fali iha mundu, tanba jornalista nain 5 mate hodi defende ukun rasik aan, sira mate tanba haklaken lia loos,” dehan nia.
Iha biban nee, Sekretariu Estadu Komunikasaun Sosial (SEKOMS), Expedito Dias Ximenes dehan, aban loron 16 Outobru 2025, komemora masakre Balibo Five ba dala 50 no komemora loron Nasional Liberdade Imprensa ba dala 3.
“Ohin ita lori jornalista barak tebes tanba aban ita komemora loron Balibo Five ba dala 50 nomos loron Nasional Liberdade Imprensa ba dala 3 iha Balibo. Hau agradese ba Prezidente Autoridade Munisipiu Bobonaro ho Administrador Postu Administrativu Balibo ho komunidade sira nia kontribuisaun ba loron importante uda nee,” haktuir nia.
Jornalista: Joseph Koa
Editor: Joseph Koa
