DILI, STLTIMORLESTE.com – Evanjelhu ba loron Segunda Semana III Tempu kuarezma 2 Rs. 5 : 1 – 15 Luc. 4 : 24 – 30 hanorin ema atu haraik aan no simu nain nia guia.
Lia hirak nee hatoo husi Padre Richardo Pasang, SVD liu husi nia reflesaun ba loron Segunda (24/03/2025) Semana III Tempu kuarezma 2 Rs. 5 : 1 – 15 Luc. 4 : 24 – 30 hatete husi evanjelhu ohin loron, Jesus hakarak hanorin ema hamoris hahalok haraik aan no simu Nai nia guia iha moris hanesan Naama.
Padre dehan, iha Primeira leitura, hatoo komandante funu nain naran Naaman. Nia naran boot tebes, liurai Siria nian, liurai mos hadomi nia tanba Nai haraik ona tulun ba Siria manan funu. Maske Naaman iha kbiit no reputasaun diak, nia hetan moras lepra, moras aat ida iha tempu neeba. Maibe, tanba sujestaun husi atan feto Izrael nian, Naaman ho haraik aan ba hasoru Elizeu, hodi hamoos nia moras lepra tuir buat neebe profeta Elizeu hateten katak “O sei ba haris dala hitu iha Jordaun, o isin sai diak, o sei sai mos. Nuudar komandante ida, nia ladun simu buat neebe profeta haruka maibe atan feto hakbesik ba nia hodi dehan hau aman, profeta nee haruka karik ita halo duni atu isin sai diak. Ikus mai, Naaman halo tuir nia isin diak fali, nia isin mos husi lepra,” dehan Padre.
Padre dehan, iha evanjelhu Jesus repete fali istoria iha tempu Elia no Elizeu neebe rona iha Primeira Leitura katak Nai Maromak haruka profeta Elia laos ba Izrael oan sira maibe ba feto faluk iha Sarfat, rai Sidonia. Liu husi feto faluk ida nee, Maromak hakarak salva Izrael oan sira husi hamlaha boot iha Izrael tomak. No mos iha tempu profeta Elizeu, ema lepra barak iha Izrael la hetan fali isin diak so deit Naaman, ema Siria nee.
Wainhira Jesus hanorin, ema Nazare sira rona ho atensaun boot. Maibe ikus mai sira hirus Jesus tanba Jesus dehan katak la iha profeta ida ema simu diak iha nia rain rasik. Sira hakarak oho Jesus tanba Jesus dehan katak Nai Maromak haruka profeta laos ba Izrael oan sira maibe ba ema non-Izrael sira no sira simu Nia bensaun ho sira nia fiar.
“Husi evanjelhu ohin loron, Jesus hakarak hanorin ita hamoris hahalok haraik aan no simu Nai nia guia iha ita moris. Hanesan Naaman, dala ruma Nai Maromak uza ema kiik sira, neebe ita la espera atu lori bensaun no transformasaun ba ita nia moris. Jesus mos hanorin atu ita nakloke aan simu Nai nia hakarak, liu husi akotesimentu fora husi ita,” katak Pe nee.
Bibi Atan kreda katolika nee dehan, nia espektativa. Nai Maromak la haree ema mai husi estatus sosial maibe haree ema nia fuan sinceru no fiar nebe metin.
“Ita apriende atu simu domin husi ema seluk maske nia ema kiak, simples no kiik iha ita nia moris, liu husi atan feto iha Siria no mos feto faluk iha Sarfat, Izrael hetan bensaun no Naaman mos husi moras lepra. Nai Maromak hakarak salva ita liu husi ema kiik, ema kiak sira,” dehan nia.
(eme)
