DILI, STLTIMORLESTE.com – Jesus hanorin ema hotu oinsa moris nafatin iha fiel, no konsisten iha fe ba Maromak no ba moris relijiozu iha pratika moris loron-loron nia.
Lia hirak nee hatoo husi Padre Richardo Pasang, SVD liu husi nia refleksaun diaria ba loron Kinta (17/10/2024).
Nia hatete, ema hotu-hotu nafatin mantein ho fe no laran metin nafatin ba Jesus Kristu nuudar nain hun no rohan laek.
“Hamoris Fe ho Sinceridade no korajen Jesus kritika Farizeu no Eskriba sira tanba sira hada rate profeta sira nian maibe nia bei ala rasik mak oho sira. Sira hakarak hatudu maibe la ho fuan (finji) katak sira fo honra ba profeta sira, maibe sira nia fuan toos nafatin no lakohi rona Maromak nia mensajen husi Liafuan diak. Atitude nunee sempre mos akontese iha ita nia moris loron-loron wainhira ita haketak fe husi asaun konkretu. Ita bele badinas reza no ba Igreja maibe ita halao buat hirak nee ho fuan sincero no corajen no halo tuir Maromak nia domin iha asaun konkretu,” katak padre.
Padre hatete, Saun Inacio de Antioquia neebe selebra ohin loron mak ezemplu real ema ida neebe fiel too rohan. Nuudar bispu no martirio, nia laos hanorin deit kona-ba fe maibe mos fo nia moris tanba Kristu.
“Nia fiar neebe forte inspira ita atu halao ita nia fe ho aten barani no fuan moos wainhira ita hasoru dezafiu mundu nee nian. Iha moris loron-loron, ita sempre hasoru situasaun neebe husi ita atu adapta ita nia hahalok ou asaun ho valores Evangelhu. Serake ita barani honestu, haraik aan no hadomi maske difisil? Santu Inacio de Antiokhia husu ita atu moris ho sincere, barani hasoru dezafiu ho fiar metin. Perguntas ba ita, serake hau bele moris lo-loos tuir Kristu nia doutrina iha asaun real loron-loron ou so deit finji hatudu katak hau relijiozu forte? Oinsa hau bele barani hatudu fiar iha desizaun no asaun loron-loron hanesan Santu Inacio de Antiokhia,” katak Pe.
Padre hatete, Leituras ohin loron fo hanoin ba ema katak fe verdadeiru tenke realizadu lo-loos iha asaun konkretu laos deit rituais ou simbolu. Ho ezemplu husi Santu Inacio de Antiokhia, inspira ema atu barani no fuan moos hatudu lo-loos fiar maske ho dezafiu no difikuldades moris tempu agora nian.
(eme)
