DILI, STLTIMORLESTE.com – Relasiona ho Festa Paskua neebe mundu tomak selebra kada tinan, hodi hanoin no reflete fila fali Jesus Kristu nia terus, susar, too mate iha krus, nunee iha loron Sesta Feira Santa, sarani Katolika Timor Leste rihun ba rihun halao via sakra no peregrinasaun hahu husi Gruta Kampung Baru too krus boot Golgota.
Padre Inocencio Diamentino da Silva SDB hatete, kreda iha mundu tomak liu-liu iha Timor halo via sakra, tradisaun neebe mak furak tebes, rikusoin neebe mak kreda fo mai ba ema atu lao tuir hodi reflete kona ba Kristu nia terus no Kristu nia mate iha loron Sesta Feira Santa nee
“Sarani sira iha Timor laran tomak, ohin ita tama ona loron santu, iha neebe Kristu fo nia moris mai ita too mate iha krus, laiha domin ida neebe mak boot liu kompara ho ema neebe fo nia moris ba ema ida, tan nee ohin loron boot ita selebra Maromak nia domin, Maromak nia laran luak neebe mak hatudu mai ita liu husi Kristu fo nia moris mai ita,” dehan Padre Inocencio Diamentino da Silva SDB ba jornalista STL iha Gruta Komoro, Dili, Sesta (18/04/2025).
Padre Inocencio tenik, via sakra nee sarani sira rona reflesaun neebe mak furak, iha neebe sarani rona katak buat neebe mak halo Jesus monu, terus, too mate iha krus mak ema nia sala, ema nia arogante, ema nia laran aat, ema nia hahalok aat sira nee mak Jesus terus no mate.
“Tan nee iha loron ida nee mai ita uza tempu didiak hodi hakmatek, reflete kona ba ita ida-idak nia aan, haree ita ida-idak nia moris, ita foin rona iha via sakra iha figura barak neebe mak ita rona, iha feto diak sira, iha Simão husi Kireneu, iha Pilatus, iha mos ema barak neebe mak hakikar ba Jesus nia mate,” katak Padre Inocencio.
Padre Inocencio mos husu ba sarani sira iha tempu ida nee ho hakmatek hodi reflete ida-idak nia aan, hodi sarani sira bele moris loloos tuir fiar neebe mak simu husi Maromak.
“Importante liu mak ita sai hanesan Jesus neebe prontu atu lori ita nia krus loron-loron, nia hasoru dezafiu oin-oin iha ita nia moris maibe nafatin prontu fo aan ba malu nuudar ema sarani hodi servi malu iha ita nia moris loron-loron nian, iha familia, iha ita nia servisu fatin, no mos iha ita nia kreda,” katak nia.
Iha fatin hanesan, Xefe Seksaun Liturjia Parokia Maria Auxiliadora Dom Bosco, Eligio Jose Marçal mos informa, nia sente entuziasmu no agradese ba sarani hotu nia prezensa masimu tur via sakra iha loron Sesta Feira Santa sae foho Golgota hodi hanoin Jesus nia terus mate iha krus tanba ema hotu nia sala.
“Hau entuziasmu no agradese ba sarani hotu nia prezensa hodi hanoin Jesus nia terus no mate iha krus, tanba ita ema hotu nia sala, horseik ita liu ona Kinta Feira Santa, ohin ita tama loron ikus ba sarani hotu atu hanoin Jesus nia mate, ho program parokia nian ita halo via sakra sae foho Santo Golgota,” nia relata.
Xefe Seksaun Liturjia nee mos hatoo mensajen ba sarani hotu tenke partisipa didiak iha Semana Santa ida nee, buka ida-idak hakmatek iha familia no sosiedade nia laran.
“Hau nia menssajen ba sarani hotu ida-idak hakmatek ho familia, sosiedade, no ba joven sira buka hakas aan loraik fo tempu ba tuir Misa Adorasaun Krus, loron ohin importante liu ba ema hotu, maska iha ema relijiaun seluk, maibe sira hateke katak loron ohin importante ba sarani Katolika iha mundu tomak,” nia sujere.
Iha sorin seluk, sarani Agus Salsinha mos hatutan, husi Sesta Feira Santa nee husu ema hotu sakrifika aan halo jejum hodi hanoin Jesus nia terus too mate iha Krus leten.
“Ita ema sakrifika uitoan hodi halo jejum iha loron Sesta, nee hatudu ita nia domin liu Jesus nia terus mate iha kruz tutun, ita tenki hakmatek hodi fo gloria ba Jesus sakrifika aan ba ita ema nia sala hotu hodi manan gloria,” nia hakotu.
EST/2
