DILI, STLTIMORLESTE.com – Jesus nia sabedoria, Jesus nia domin liu husi kura ema moras no lori esperansa ba nia povu halo ema barak saudade Jesus iha sira nia moris.
Padre Richardo Pasang SVD ba STL liu husi refleksaun ba loron Segunda (09/02/2026) hatete, Jesus sempre tulun nia ema sira liu husi nia domin no sabedoria kura ema neebe moras no fo esperansa ba ema neebe lakon esperansa ho sira domin neebe iha halo ema barak saudades Jesus nia diak tomak.
Padre dehan, Jesus mak buat hotu nia hun no rohan, tanba nee bainhira ema lakon esperansa tanba hasoru tensaun no problema oin-oin nafatin tau konfiansa tomak iha Nai ho konfiansa neebe hatoo liu husi ema nia fiar ba Jesus sei hetan salvasaun.
Padre dehan, refleksaun ba loron Segunda koalia kona-ba “Hau Saudades O,” katak ema saudades Jesus iha sira nia moris.
“Povu sira Genesare nian saudades tebes Jesus nia prezensa, Jesus lori esperansa, ksolok no kura ba sira neebe presiza, ema barak tebes mai atu hetan kura. Sira fiar too ona ba sira atu kona deit ninia hatais nia rohan, no ita sei hetan kura, mai ba Jesus ho fiar no fiar salvasaun, ita mos fiar no iha fiar ba Jesus? Ita mos iha tempu naruk atu hadia ita-nia aan atu ema barak sei saudades nafatin ita,” dehan Padre.
Padre dehan, ema presiza hadia aan no hadia hahalok sira no halo diak ba malu iha familia no sosiedade, nunee ema barak mos bele saudades.
Jesus mak hun no rohan no Jesus mak nain ba buat hotu, tanba nee bainhira iha moris hasoru problema ka dezafiu iha moris keta lakon esperansa, maibe tau nafatin konfiansa tomak iha Jesus Kristu, tau fiar tomak ba Jesus, Jesus sei rona hodi rezolve problema hotu, no fo solusaun ba problema neebe ema hasoru.
Tanba nee ema idak idak mos presiza moris tuir saida mak jesus hanorin, buka hadomi malu, respeita malu, tulun malu bainhira maluk ruma presiza tebes, ho buat diak hotu neebe halo iha moris, Nai mos sei haraik grasa.
(eme)
