BAUKAU, STLTIMORLESTE.com – Familia pasiente JF neebe hakotu iis iha Hospital Rejional Eduardo Ximenes, (HoREX) Baukau, konsidera mate tanba aimoruk Levothyroxine ba tratamentu laiha.
Familia Matebian, Joaquin do Rosário Freitas haktuir, pasiente JF husi Aldeia Maukale, Suku Gariuai,
Postu Administrativu Baukau Vila Munisipiu Baukau, neebe hahu halo tratamentu iha HoREX Baukau, iha loron 18 Janeiru 2025 no hakotu iis iha loron 21 Janeiru 2025, tanba moras, maibe durante tratamentu, pasiente nee la simu aimoruk husi mediku sira, maibe utiliza deit infus ho oksijeniu.
“Sira fo hatene aimoruk hanesan nee laiha, nain hira osan iha karik ajuda lai buka, hau buka iha Baukau laran laiha, hau ba sosa iha Dili fila kedan, maibe tuir dalan simu telefone dehan bin laiha tiha ona,” haktuir familia Matebian, Joaquin do Rosário Freitas ba STL liu husi telefone, Kuarta (22/01/2025).
Hafoin familia matebian JF simu tiha reseitas husi mediku sira katak, ba buka kedas sosa aimoruk ho naran Levothyroxine iha apotika sira iha Baukau, maibe la hetan, tanba la faan, nunee deside ba kompras iha Dili ho folin US$ 5.00 neebe tablet 1 iha aimoruk musan 10.
Bainhira remata sosa aimoruk deside fila kedas, maibe sei tuir dalan estrada publiku Diresaun Dili Baukau simu kontaktu katak, pasiente JF hakotu ona iis, tanba aimoruk too tarde.
“Sira fo reseita nee hau husu kedan, aimoruk nee hau ba hola agora nia atu konsumu ga oinsa, sira hatan aimoruk nee presiza loos atu konsumu, ida nee mak hau foin ba hola nee,” haktuir familia pasiente nee
Hatan ba kestaun nee, Diretor Ezekutivu HoREX Baukau, Claudio Ximenes argumenta, mediku sira rekomenda atu fo aimoruk Livoteroxina ba pasiente matebian JF, laos ba sosa hodi pasiente matebian konsumu kedas, maibe atu prepara deit, bainhira remata ona ezaminasaun hafoin fo aimoruk refere ba matebin konsumu.
“Karik familia mak intensaun lalais entaun sira ba hola aimoruk nee, atu dehan ita nia aimoruk nee iha hospital iha, maibe la tama ba lista esensia iha tinan ida nee,” hatete Claudio.
Diretor Ezekutivu HoREX nee deklara, aimoruk Levothyroxine ba tinan 2025 iha HoREX la inklui iha lista esensial hodi garante iha armajen HoREX, maibe rai deit iha armajen INFP, bainhira iha ona nesesidade ba aimoruk refere, hafoin mediku sira relata hodi foti iha armajen INFP.
Tanba hanesan nee, asegura duni iha armajen HoREX nian, maibe laiha nesesidade moras sira atu utiliza aimoruk refere too estragus deit, nunee tinan nee la tama iha lista esensial, garante deit iha armajen INFP Rejional.
“Pasiente nee lo-loos seidauk halo tratamentu, rekomenda fo duni aimoruk nee, maibe tenke liu husi ezaminasaun neebe halo iha HNGV, ita labele halo iha nee, tanba moras Hipotiroid,” Claudio argumenta.
Pasiente nee moras Hipotiroid, neebe kauza muta no temperatura manas tuun, nunee mediku sira iha HoREX halo estabelesimentu ba saude hahu rekupera ona no planu atu lori ba Hospital Nasional Guido Valadares hodi halo ezaminasaun hafoin konsumu aimoruk refere.
Maibe iha loron 21 Janeiru tinan nee, parte dader, mediku sira halo vizita familia pasiente matebian refere, hatuur ona pasiente matebian JF iha kadeira hodi fo han, maibe derepente hahan hisik fali JF nunee mediku sira halo asistensia hanesan Bomba JF nia pulmao, maibe la konsege salva.
“Pasiente sira kondisaun lemah hanesan nee tolan neineik, dala ruma sira fo han lalais, seidauk tolan hotu hahan nisik fali nian, tanba la liu husi nia dalan ba tama iha dalan respirasaun nian, nee mak atake nian iha neeba,” dehan Claudio.
Pasiente Matebian JF neebe hakotu iis, Claudio konsidera laos tanba laiha aimoruk nomos laos tanba aimoruk Livoteroxina neebe mediku sira hateten, maibe tanba bronkuaspirasaun. Nunee husu publiku atu intende, tanba Hospital laiha hanoin atu hakotu ema nia vida iha mundu.
Entretantu Mediku Epesialista neebe atende pasiente matebian JF, Fidel Rotos hatete, pasiente JF mate laos tanba aimoruk laiha, maibe antes too iha HoREX Baukau hetan tratamentu ho kondisaun neebe Grave kauza husi bronkuaspirasaun.
(EST 2)
