BAUKAU, STLTIMORLESTE.com – Relasiona ho pasiente matebian JF neebe nia mate sai polemika iha Media Sosial, Prezidente Autoridade Munisipiu Baukau, Veneranda Lemos konsidera falta koordenasaun entre familia JF ho parte Dirijente Hospital Rejional Eduardu Ximenes (HoREX).
Prezidente Autoridade Munisipiu Baukau, Veneranda Lemos haktuir, hafoin hetan pasiente matebian JF hakotu iis iha HoREX Baukau, orienta kedas Sekretaria Munisipal Asuntu Sosial no Organizasaun halo kontaktu ho Diretor Ezekutivu HoREX hodi hatene situasaun neebe akontese.
Maibe liu husi kontaktu parte Diretor Ezekutivu HoREX hatan, JF mate kestaun laos aimoruk laiha, maibe moras ho kondisaun grave, tanba aimoruk neebe atu trata ba moras neebe JF enfrenta nee HoREX iha hela atu atende, maibe falta koordenasaun entre mediku sira neebe atende JF parte HoREX rasik.
“Iha nee mak hau baibain hateten, koordenasaun no komunikasaun nee importante tebes, hau apela ba komunidade sira kuandu ba konsulta mak doutor fo reseita tenke husu fila fali, serake hau tenke ba sosa aimoruk, aimoruk nee iha ga laiha, se lae ita duun malu, aimoruk iha hela, mais ita dehan aimoruk laiha,” hatete Veneranda ba STL iha Vila Nova, Kinta (23/01/2025).
Iha informasaun neebe HoREX relata ba Autoridade Munisipal Baukau katak, pasiente matebian JF iha moras kondisaun grave, maibe mediku sira esforsu hodi fo asistensia masimu no fo kedas informasaun ba parte familia atu labele fo bee ba JF, tanba sei liu prosesu ezaminasaun, maibe parte familia fo bee, JF hetan atake.
Maibe derrepente mosu polemika kona-ba aimoruk Livoteroxina stoke iha HoREX laiha, Prezidente Autoridade nee konsidera, nee propaganda, tanba Diretor Ezekutivu HoREX fo informasaun, HoREX iha hela aimoruk refere.
“Liu-liu ba aimoruk, Diretor HoREX rasik hatete, aimoruk nee iha, mais derrepente dehan aimoruk laiha, ba hau bele dehan nee propaganda, mais Diretor HoREX mak dehan aimoruk laiha, ita bele dehan atendimentu ladun diak,” Veneranda hatete.
Prezidente Autoridade Munisipiu Baukau nee husu ba komunidade sira, bainhira hetan moras hakat ba fasilidade saude sira hodi konsulta mak mediku sira fo reseita atu ba sosa aimoruk iha liur, tenke halo konfirmasaun ba parte farmasia hafoin hakat ba klinika privadu sira hodi sosa.
Aleinde mos husu Diretor Ezekutivu HoREX Baukau atu tau atensaun masimu ba servisu sira iha Hospital nomos iha kooperasaun no komunikasaun ho mediku sira inklui familia pasiente no pasiente sira.
Entretantu pasiente matebian JF husi Aldeia Maukale, Suku Gariuai, Postu Administrativu Baukau Vila, Munisipiu Baukau, neebe hahu halo tratamentu iha HoREX Baukau, iha loron 18 Janeiru nee no hakotu iis iha loron 21 Janeiru tinan 2025, tanba moras Hipotiroid.
(EST 2)
