BAUKAU, STLTIMORLESTE.com – João Bosco Ximenes sai vensedor ba eventu Timor Island Adventure “Kurida Bisikleta” neebe lansa husi Prezidente Republika, Jose Ramos, hahu husi Fulan Fehan Belu Indonezia too iha Munisipiu Baukau.
João Bosco sente kontente no agradese, tanba durante eventu refere hahu husi Indonezia too iha Munisipiu Baukau Timor Leste lao diak, tanba durante eventu refere la hasoru dezafiu iha dalan.
“Hau sente kontente, durante loron hira Komisaun Organizadora sempre ajuda ami iha dalan nomos finis line. Ami laos halai ba juara, maibe ami promove turizmu husi Indonezia no Timor Leste,” hateten Bosco hafoin too uluk iha finis line Vila Nova Baukau, Sesta (13/12/2024)
Tuir Nia, eventu refere atu promove Turizmu husi Indonezia no Timor Leste no too uluk iha finis line laos buka primeru lugar ba eventu refere, maibe hakarak too uluk atu deskansa, tanba viajem distansia dook no kolen.
Nia agradese ba kooperasaun servisu entre Timor ho Indonezia, tanba durante viajem la hetan perturbasaun iha dalan, maibe difikuldade mak dalan ba eventu refere, tanba hasoru foho no dalan aat.
“Hau husu ba Timoroan tomak atu labele lakon kompete iha desportu saida deit neebe mak ita bele halao nafatin, tempu ita esforsu sei too fatin neebe ita bele,” Bosco enkoraja.
No nia husu Governu Timor Leste atu nafatin kria eventu hanesan nee iha territoriu nasional, nunee fo kompetisaun ba Timoroan sira atu prepara aan diak liu tan ba eventu korida bisikleta sira tuir mai.
João Bosco Ximenes husi Postu Administrativu Baguia, Munisipiu Baukau neebe partisipa iha eventu refere hamutuk ho korida bisikleta Australia oan feto too iha finis line Baukau iha oras 10:52 Oras Timor Leste.
Tuir observasaun jornalista STL nian nota katak, bainhira João Bosco too iha fatin refere, parte Komisaun Organizadora fo tara Tais Timor, tanba Bosco nuudar vensedor ba eventu refere.
(EST 2)
