KUALA LUMPUR, STLTIMORLESTE.com – Jogador futebol husi Timor-Leste, João Pedro da Silva Freitas, sai atensaun depois nia partisipa hamutuk ho ekipa ASEAN All-Stars hasoru klubu gigante Ingles, Manchester United, iha jogu amigavel neebe realiza iha loron 28 Maiu 2025 iha Estadiu Nasional Bukit Jalil, Kuala Lumpur, Malazia.
Jogu nee hanesan parte husi Maybank Challenge Cup neebe ho objetivu atu rekolla osan ba Yayasan Al-Sultan Abdullah (YASA), nunee mos promove futebol Azia Sudeste iha mundu internasional.
João Pedro, atakante ho idade 26 anos neebe joga ba klubu Cambodian Premier League, Angkor Tiger FC, hatudu performa neebe brilhante durante tinan 2024. Nia rejista nia naran hanesan artilheiru top istoriku ba ekipa nasional Timor-Leste ho 7 golu husi 22 jogu.
Ida husi momentu nia marka hat-trick iha vitoria 4-1 kontra Mongolia iha kualifikasaun Piala Azia AFC 2027 iha Bali, Setembru 2024, no mos golu kontra Kamboja iha ASEAN Championship 2024.
Selesaun João Pedro ba ekipa ASEAN All-Stars la sai husi nia performa impresivu no profesionalismu iha kampu. Federasaun Futebol ASEAN (AFF) ho lideransa Mayor Jenderal Khiev Sameth rekonhese kontribuisaun Pedro hanesan reprezentante talentu joven husi Timor-Leste, nasaun ida ho ranking FIFA 192 husi 207.
Jogu nee lideradu husi treinador xefe ekipa nasional Vietnam, Kim Sang Sik, neebe foin manan ASEAN Mitsubishi Electric Cup 2024.
Ekipa ASEAN All-Stars rasik kompostu husi jogador sira neebe diak liu husi nasaun 12 membru AFF, inklui jogador Vietnam hanesan Nguyễn Hoàng Đức, Nguyễn Quang Hải, no Đỗ Duy Mạnh. Prezensa Pedro hamutuk ho naran boot sira nee konfirma potensial futebol Azia Sudeste neebe sei dezenvolve.
Partisipasaun João Pedro iha jogu nee sai hanesan orgulhu espesial ba povu Timor-Leste. Ho populasaun milhaun 1,4 deit, futebol sai hanesan desportu ida neebe popular no bele hamutuk ho povu. Prezidente Federasaun Futebol Timor-Leste (FFTL), Nilton Gusmão dos Santos, mos simu konvite VIP atu asiste jogu nee, neebe hatudu rekonhesimentu ba dezenvolvimentu futebol iha nasaun nee.
Maske Timor-Leste nunka partisipa iha Tasa Mundial (World Cup) FIFA ka Tasa Azia AFC, susesu Pedro atu tama iha skuadra ASEAN All-Stars sai prova katak talentu lokal bele kompete iha nivel internasional.
Ba João Pedro, jogu nee hanesan oportunidade diak atu hatudu nia kapasidade ba mundu. Ho esperiensia iha liga Kamboja no iha ekipa nasional, nia prontu atu fo surpresa.
“Nee momen istoriku ba hau no Timor-Leste. Hau sei esforsu atu fo onra ba nasaun nia naran,” Pedro dehan iha entrevista ho media lokal.
Iha jogu nee rasik, ASEAN All-Stars susesu halakon Manchester United ho skor 1-0 liu husi Maung Maung Lwin nia golu iha minutu 71.
(stl)
