DILI, STLTIMORLESTE.com – Jogu Voli Praia Feto Timor Leste (TL) iha oportunidade hetan osan mean no ekipa Mane iha oportunidade hetan osan mutin, maibe ida nee depende ba jogu.
Treinador Voli Praia, Mario Riberto ba jornalista STL hafoin remata jogu semi final Jogus Desportu Comunidade dos Países de Língua Portuguesa (CPLP) ba dala XII, iha Kampu Voli Praia tasi ibun Lecidere, Dili, Kuarta (23/07/2025).
“Ita husi ekipa Feto iha oportunidade hetan medalha osan mean no ekipa Mane iha mos oportunidade hetan medalha osan mutin, maibe depende iha jogu, tanba joga Voli Praia nee laos uza forsa maibe joga uza tekniku no kakutak oinsa atu soe bola nunee ita nia adversariu labele salva bola hodi hetan pontus,” dehan Treinador Voli Praia TL.
Nia haktuir tan katak, jogador husi TL husi ekipa Feto no Mane kuaze joga diak, maske hasoru ekipa adversariu sira ho altura aas maibe tatika jogu nee kuaze hanesan deit, sira metru ida TL mos metru ida.
Iha oportunidade hanesan, Jogadora Miquelia Belo iha optimista manan hodi hetan medalha osan mean maibe ida nee depende jogu.
“Hau nafatin optimista atu hetan medalha osan mean ho hau nia kolega Agusta Belo da Silva, maibe ida nee depende ba jogu,” dehan Miquelia Belo.
Tuir observasaun STL iha Kampu Voli Praia Tasi ibun Lecidere Dili, ekipa Feto TL hasoru Moçambique ho rezultadu iha skor set dahuluk TL hetan pontus 21 no Moçambique halibur pontus 15, nunee iha skor set segundu nafatin manan husi TL ho pontu 21 no Moçambique 19.
Jogadora feto neebe jogu Voli Praia husi TL mak Miquelia Belo ho Agusta Belo da Silva no jogadora husi Moçambique mak Alaina Mahumane ho Celia Machava.
Jogu Voli Praia husi Mane, Portugal mak manan ho skor set jogu dahuluk hetan pontus 21 no Moçambique hetan pontus 11.
Iha skor set segundu kontinua manan nafatin husi Portugal ho pontus 21 no Moçambique hetan pontus 14.
Jogu Feto husi jogu Voli Praia Portugal hasoru Cavo Verde, Portugal mak manan ho skor set dahuluk Portugal halibur pontus 21 no Cavo Verde halibur pontus 12, nunee kontinua jogu iha skor set segundu, nafatin lidera husi Portugal ho pontus 21 no Cavo Verde hetan pontus 18.
Iha jogu Voli Praia Mane, Timor Leste hasoru Cavo Verde iha skor set dahuluk TL halibur pontus 22 no Cavo Verde halibur pontus 24. Kontinua ba skor set segundu TL hetan pontus 21 no Cavo Verde hetan pontus 19, no skor set datoluk nian TL halibur pontus 5 no Cavo Verde halibur pontus 15, nunee jogadores husi Nasaun Cavo Verde mak hakat ba semi final, enkuantu TL sei joga atu hadau terseiru lugar.
(jos)
