DILI, STLTIMORLESTE.com – Jornalista ida husi Media SAP News hatoo keixa ba iha Ministeriu Publiku hasoru estudante balu.
“Ohin Asosiasaun Jornalista tolu hanesan AJTL, TLPU no UPJTL mai akompanha kolega jornalista ida neebe iha Tersa liu ba halo kobertura iha Universidade ida iha Dili, hetan baku husi estudante balu, ami akompanha mai iha Ministeriu Publiku atu hato’o keixa hodi prosesa tuir dalan legal neebe iha,” dehan Prezidente UPJTL, Horacio Babo ba jornalista sira iha Matadoru, Kinta (23/10/2025).
Tuir nia, dala barak jornalista halao sira nia atividade tuir lei komunikasaun sosial hodi asesu livre ba informasaun, nunee iha loron hirak liu ba jornalista balu ba halao kobertura iha universidade neeba, sira mak konvida tiha ba no ikus mai estudante sira nee mak baku fali jornalista ida, tanba nee hatoo keixa atu prosesu bele lao ba oin.
Keixa neebe ami hatoo, primeiru ba iha oknum sira neebe halo violensia ba jornalista nee no hatama keixa nee lori mos ho evidensia hanesan video neebe mak iha,” nia esplika.
Nia afirma, simu deskulpa husi Reitor Universidade nian, maibe kona-ba krimi nia dalan mak tenke liu husi prosesu justisa, ida nee laos ba jornalista deit maibe ba se deit mak hetan krimi tenke liu husi prosesu justisa, nunee Tribunal mak bele deside se mak loos no se mak sala.
Konsidera jornalista mos ema, laos konvida tiha ba halo kobertura tula fali liman nee lalos, kontribui ba dame no estabilidade labele iha dalan ba violensia, se violensia ba jornalista mak nia fatin tenke liu husi keixa no prosesa ba oin.
Nia fundamenta, prosesu ida nee tenke avansa ba oin, tanba jornalista laos kriminozu, la iha dalan atu baku jornalista.
Apelu mos ba universidade sira atu respeita servisu jornalista nian, tanba jornalista mak liman ain ba informasaun, fontes ba informasaun, fasilita informasaun ba publiku, jornalista rekolha informasaun atu publika, fasilita informasaun, husu atu respeita no valoriza jornalista nia servisu, laos buat kiik ida baku jornalista nee labele, tenke respeita vokasaun jornalista, se baku la iha toleransia.
Jornalista: Terezinha De Deus
Editor: Xisto Mendonça
