DILI, STLTIMORLESTE.com – Sekretariu Estadu Komunikasaun Sosial (SEKOMS), Expedito Dias Ximenes husu jornalista sira neebe halo kobertura iha manifestasaun sira hasoru Parlamentu Nasional tenke imparsial no tuir kodigu etika.
Sekretariu Estadu Komunikasaun Sosial SEKOMS Expedito Dias Ximenes hatoo kestaun nee ba jornalista, bainhira remata partisipa fahe premio ba manan nain iha pPalasiu Prezidensial Nicolao Lobatu, Bairo Pite, Tersa (16/09/2025).
Nia dehan, husu ba kolega jornalista sira neebe halo kobertura ba atividade ba manifestasaun, atu neebe nafatin kaer kodigo etika jornalismo.
“Iha kodigu jornalizmu tantu hatete, kolega jornalista sira halao knaar nafatin ho imparsial,“ dehan Expedito.
Nia hatete, jornalista sira nafatin hatudu profesionalismo no imparsial iha situasaun sira hotu, no iha situasaun ruma neebe bainhira jornalista sira labele ba nee tenke respeita.
“Hau hein katak kolega jornalista sira nafatin respeita kodigo etika jornalismo nia, se bainhira iha situasaun ruma ka tanba seguransa husu atu ita labele tama too iha laran, ita tenke respeita. Iha sorin seluk publiku mos presiza informasaun, hotu hotu avansa teknolozia konserteza laos deit konvesional sira halo reportajen livestrime, iha mos publiku neebe hola parte iha situasaun sira nee hanesan nee sira mos halo, husu deit hanesan mai husi komunidade media hein katak, kolega jornalista sira tau aan respeita no hakruuk ba kodigo etika, liu liu prinsipiu baziku mak imparsialidade no neutralidade,” katak nia.
Jornalista: Emerenciana Pinto
Editora: Domingas Gomes
