LIKISA, STLTIMORLESTE.com – Servisu jornalista laos buka oportunidade, maibe presiza profisionaliza iha servisu, oinsa bele eduka sosidade sai efetivu.
“Ita hanoin katak servisu jornalista laos ba buka oportunidade, maibe ba atu servi, no sai ema edukador ba publiku, hodi oinsa bele buka tuir informasaun ba komunidade nian iha sosiedade, tanba sosiedade atu sai efetivu presiza kreatividade jornalista nian,” dehan Eis Jornalista Tempo Indonezia nian, Untung Widyanto ba jornalista sira iha Likisa, Segunda (09/12/2024).
Tuir Eis Jornalista Tempo Indonezia nian nee hatete, jornalista nia servisu mak buka tuir informasaun, hodi bele publika ba publiku no mundu atu hatene situasaun neebe komunidade ka estadu nee enfrenta, tanba tenke servisu ho transparente labele buka oportunidade, maibe tenke sai ema edukador hodi eduka sosiedade sai buras ho diak.
Tanba knaar jornalista mak bele hakerek informasaun neebe los no kredivel, laos aumenta fali interese jornalista iha laran, hodi halo kritika. Nee matadalan ida fora husi etika jornalizmu nian, tanba nee jornalista hotu-hotu tenke ativa masimu iha mundu jornalizmu nian, atu bele hakerek informasaun nee faktu no atuais ba publiku sira hodi lee no hatene.
Iha fatin hanesan, Xefi Gabinete SECOMS, Eliseu Isaac hatete, jornalista tenke esforsu aan hodi update nafatin informasaun tuir kodiku jornalizmu nian, tanba husi jornalista mak ema bele konhese sosiedade nia problema no preokupasaun sira.
Tanba nee husi meiu hirak neebe jornalista sira foti atu halo, presiza lori informasaun neebe klaru, detail hodi konvida publiku atu partisipa no garante katak kondisaun ka situasaun neebe sosiedade sempre enfrenta, mai ho razaun nee razoavel, entaun jornalista nia knaar mak tenke buka hatene fukun husi preokupasaun sira neebe komunidade enfrenta iha publiku, atu publika ba kargu xefia sira hodi halo dezenvolvimentu.
Iha sorin seluk, Prezidente Konselhu Imprensa, Otelio Ote afirma, jornalista labele manan oportunidade deit, maibe tenke sai ema inteligente neebe diak ba informasaun sira, labele sai jornalista neebe laiha transparente, maibe tenke ema neebe iha espiritu independente, atu trasa informasaun neebe diak ba publiku hodi lee.
(EST 1)
