DILI, STLTIMORLESTE.com – Jornalista Senior husi ABC News, Philippa McDonald husu ba jornalista sira halo verifikasaun ba informasaun loos no faktus, hafoin halo publika informasaun ba sosiedade.
“Ita atu halo informasaun ruma, hanesan problema ka isu sosial balun iha sosiedade, presiza halo verifikasaun nunee informasaun nee iha akurat, hafoin halo publikasaun, tanba nee jornalista tenke verifika informasaun nee loos no faktus,” dehan Philippa ba jornalista no akademiku sira iha salaun Farol, Dili, Kinta (14/11/2024).
Informasaun saida deit mak jornalista sira atu foti tuir Philippa importante liu mak tenke halo uluk verifikasaun no peskiza diak ba fonte nia naran no nia titulu sira, buka hatene oinsa hekerek no tanba informasaun neebe jornalista sira presiza verifika diak, nunee bele hatene didik faktu lo-loos husi informasaun neebe iha, nunee bele halo publikasaun neebe mais efetivu ba sosiedade no publiku atu asesu ho diak.
“Ita jornalista tenke publika informasaun neebe loos, labele fiar deit ita nia memoria, maibe presiza verifika didiak informasaun, ema nia naran, pozisaun, hela fatin, loron, nunee bele atualiza informasaun neebe faktu los ba publiku.” Nia sublina.
Maibe nia dehan, jornalista sira tenke halo pratika ba pronunsia informasaun ho lo-loos, liu-liu ba nuneral, hanesan milhaun, bilhaun, no seluk, tanba liafuan sira nee mak ema sei nota, duke informasaun neebe iha.
Iha sorin seluk, jornalista husi Radio Komoro, Florentina Bianco da Cruz akresenta katak, informasau neebe mak ABC fahe ba jornalista sira, bainhira update informasaun sosial ruma presiza halo verifikasaun didika, nunee informasaun bele sai akuradu, tanba jornalista bainhira husu ona ba fonte, hodi hatene informasaun presiza halo verifikasaun ba dadus balun, nunee bele publika informasaun tuir dalan neebe iha, faktus no realidade, pronunsia fonte ida nian, nunee iformasaun nee bele iha akurasia.
(mar)
