DILI, STLTIMORLESTE.com – Ministru Ensinu Superior Siensia Kultura (MESSK), José Honorio da Costa Pereira dehan, ensinu superior fatin haburas siensia hodi forma sidadaun sira sai kritiku no profisional.
Lia hirak nee hatoo husi Ministru Ensinu Superior Siensia Kultura (MESSK), José Honorio da Costa Pereira ba jornalista sira, hafoin partisipa iha konferensia internasional Symposium iha City 8, Tersa ( 14/10/2025).
“Ensinu superior labele sai deit fatin hodi aprende matenek, sai mos fatin ida hodi guia no haburas siensia, tanba ho siensia mak ita bele dezenvolve nasaun ida nee ho diak no siensia mos sai fatin ba inovasaun atu hatan ba dezafius sira,” dehan Honorio.
Nia esplika, siensia laiha fronteira, konhesimentu sai buras wainhira partilha ba malu, halo debate no aplika benifisiu ba sosiedade, ensinu superior nuudar instrumentu fundamental no dezenvolvimnetu sustentavel.
Nia afirma, konferensia akademiku ida nee plataforma, interesante tebes, iha neebe labele troka ho meius sira seluk iha interkambiu akademiku no sentidu ida nee mak sai aktu ida atu bele diskuti no aprende.
“Asuntu nee sai importante liu, tanba TL sei tama ba iha komunidade ASEAN, Governu TL liu husi MESSK iha konsiensia tomak katak presiza duni atu hametin ensinu superior ba dezenvolvimentu nasional,” Honorio haktuir.
Nia dehan, dezafius ida mak estudante sira lakohi atu lee, hadomi siensia no teknolojia hodi transforma solusaun pratika no ba dezenvolvimentu nasional.
“Problema ida mak estudante sira mos lakohi atu lee, ida nee sai dezafius ida ba Timor oan sira, koalia mak barak maibe la lee, ida nee mos problema boot ida,” Gonoriu hakotu.
Iha fatin hanesan, Prezidente Republika (PR), Jose Ramos Horta hateten, estudante labele gasta tempu barak liu ba estuda buat neebe mak la tama ba ulun.
“Fulan hirak liu ba hau fo diskursu, wainhira hau hatoo hau nia diskursu hau hatete ba estudante sira favor boot ida labele gasta tempu atu estuda deit ba buat neebe mak la tama ba ita nia ulun, no iha estudante barak liu mak hakarak estuda kona-ba siensia humanidade,” dehan Horta.
Horta dehan, iha nasaun barak partikulatmente iha Japaun teknolojia liga ho umanidade, tanba estudante barak hakarak buka ida neebe mak baratu no fasil liu, neebe estuda kona-ba siensia no seluk tan.
Jornalista: EST 1
Editor: Xisto Mendonça
