BAUKAU, STLTIMORLESTE.com – Kompanhia JOVA Constraction Unipessoal Lda hahu ona nia servisu iha projetu reabilitasaun estrada urbana Baukau Vila, Munisipiu Baukau.
Diretor kompanhia JOVA Constraction Unipessoal Lda, José Sebastião da Silva hateten, hafoin Governu liu husi Ministeriu Obras Publikas selebra kontratu ho kompanhia JOVA Constraction Unipessoal Lda no Vage’el Unipessoal Lda ba projetu reabilitasaun estrada urbana Baukau iha loron 06 Fevereiru 2026, iha loron 07 Fevereiru 2026, parte kompanhia JOVA mobiliza kedas ekipamentus servisu iha projetu reabilitasaun estrada refere.
“Projetu nee rasik Sabadu nee kedas ami JOVA hahu ona husi star point hadia daudaun ona, ekipamentu ohin sira lori sae ona balu destaka iha neeba, Sabadu nee kedas ami identifika kedas estrada nia luan. Primeiru star hadia uluk dalan nee, tanba estrada hahu husi Nagardjo too Hospital nian nee la diak, entuan ita hadia uluk lai para lao hodi servisu,” José Sebastião da Silva informa ba STL liu husi telefone, Segunda (09/02/2026).
Nia sublina, servisu dahuluk neebe parte kompanhia JOVA hahu halo ona mak hanesan hadia uluk estrada kuak sira diresaun husi area rotunda Nagardjo Uainiki nian too iha area Hospital Rejional Eduardo Ximenes (HoREX) Baukau, tanba daudaun kondisaun aat no kuak iha neebe difikulta parte kompanhia transporta ekipamentus servisu iha projetu refere.
Nia fundamenta, servisu seluk neebe parte kompanhia halo hafoin asina kontratu ho Governu mak parte JOVA halo ona identifikasaun ba estrada nia luan diresaun husi area rotunda Nagardjo Uainiki nian too rotunda Vila Nova, tanba tuir dezenhu diresaun estrada refere sei luan too metru 16, maibe durante identifikasaun iha komunidade balu afetadu ba projetu refere.
“Iha titik tolu ga haat iha afetadu, maibe maluk afetadu sira nee kolabora, maibe rai privadu sira nee sira husu oinsa atu konsidera sira, entaun Sabadu nee ami hateten sei koalia fila fali ho autoridade no projetu nia nain, tanba kompanhia nee ezekuta deit projetu nee tuir dezenhu neebe iha,” katak José Sebastião da Silva.
Nain ba kompanhia JOVA komenta, durante identifikasaun ba estrada urbana Baukau Vila ho kilometru 23 nee, parte kompanhia identifika iha komunidade afetadu nunee sei relata ba Autoridade Munisipiu Baukau no Ministeriu Obras Publikas atu haree kestaun refere, tanba parte Autoridade Munisipiu Baukau no Ministeriu Obras Publikas mak iha kompetensia atu rezolve problema refere, enkuantu parte kompanhia ezekuta deit projetu.
José esplika, projetu reabilitasaun estrada urbana Baukau Vila hamutuk kilometru 23 fahe ba pakote 2 ho dezenhu kompletu neebe responsabiliza husi kompanhia JOVA Constraction Unipessoal Lda no Vage’el Unipessoal Lda. Iha pakote dahuluk responsabiliza husi kompanhia JOVA tuir dezenhu estrada diresaun husi rotunda Nagardjo too areador Igreja Tirilolo nian luan nia too metru 16, tanba diresaun estrada refere pista 2 kompostu parte estrada klaran metru 1 estabelese jardim, tortoar ba ema lao ain hamutuk metru 2 sei estabelese metru ida iha estrada liman karuk nian no metru ida iha liman los, enkuantu metru restu ba Aspal.
No estrada diresaun kontinua husi Tirilolo ba iha Vila Antiga no remara iha area rotunda Nagardjo Uainiki mantein ho diresaun ida, maibe nia luan too metru 8, tanba sei utiliza metru 2 ba estabelesementu tortoar iha estrada sorin sorin atu fasilita ema lao ain no metru 6 ba aspal.
“Ita nia esperansa mak halo diak no lais, mais dala ruma ita mos labele koalia ibun midar deit, mais ita nia pratika mak loron-loron iha terenu neebe ohin loron hahu ona fulan Fevereiru hotu ba mak ita haree nia progresu,” José Sebastião da Silva argumentu.
Entretantu tuir dadus neebe STL iha, projetu reabilitasaun estrada urbana Baukau Vila pakote I (Seksaun 00+000-02+880.0 Ospital Nagardjo- Baukau (Ospital Rejional Eduardo Ximenes), Munisipiu Baukau ho Kontratu; SSS/007/MOP – 2026, durasaun servisu fulan 24.Projetu nee fiskaliza husi Ministeriu Obras Publikas ho montante orsamentu US$ 4,735,021.55, responsabiliza husi empreza Jova Construction Unipessoal Lda (Timor Leste).
Alende nee, rehabilitasaun estrada urbana pakote II (Seksaun 1 – 5), Munisipiu Baukau Kontratu: SSS/008/MOP – 2026, durasaun servisu fulan 24, montante orsamentu US$ 3,764,933.21 fiskaliza husi Ministeriu Obras Publikas, kontrator Vage’el Unipessoal Lda (Timor Leste).
(tom)
