BAUKAU, STLTIMORLESTE.com – Joven feto ida ho idade 18 hakotu vida liu husi tara aan iha Suku Larisula, Postu Administrativu Baguia, Munisipiu Baukau.
Komandante Interinu Komando Polisia Munisipiu Baukau, Superintendente João Sancho Pires esplika, insidente nee akontese iha loron 10 Junhu, akontese iha Suku Larisula, Postu Baguia, joven feto inisial E.F.P, idade 18 oho aan liu husi tara aan, tanba deskonfia vitima la satisfas ho moras epelipsi.
“Kazu tara aan iha Larisula semana kotuk ita nia Polisia sira too kedas fatin koalia ho familia atu lori ba autopsia, maibe lakohi dehan katak oan nee iha moras oituan,” hateten João Sancho Pires ba jornalista sira iha Vila Nova, Segunda (16/06/2025).
Nia sublina, kazu nee akontese bainhira Polisia Eskuadra Postu Baguia too iha fatin akontesimentu hodi haree, maibe parte familia tesi kotu ona tali, nunee koordena hodi submete ba prosesu autopsia, maibe parte familia la aseita, tanba razaun vitima rasik mak oho aan.
Komandante Interinu Komando Polisia Munisipiu Baukau nee akresenta, mezmu parte familia la aseita hodi submete mate isin ba prosesu autopsia, maibe parte polisia rejistu ona kazu nee iha Ministeriu Publiku hodi kontinua prosesu.
“Vitima tara aan iha uma laran, maibe iha uma rua, vitima tara aan fali iha uma tuan laran,” João Sancho Pires informa.
Entretantu mate isin E.F.P tuir planu familia sei haloot iha loron 16 Junhu nee tuir kultura Suku Larisula nian.
(tom)
