BAUKAU, STLTIMORLESTE.com – Joven ida ho inisial AFDCS neebe idade 20 mate hafoin hetan asidente, iha Postu Administrativu Laga, Munisipiu Baukau.
Enkuantu vitima AFDCS konduz ho motor Revo X sapa matrikula W. 9616 TL neebe tula ho nia Aman husi diresaun Postu Administrativu Baguia atu ba Postu Kelikai, maibe too iha area Larifanu, Suku Libagua, Postu Laga hetan asidente, neebe soke malu ho karreta truk sapa matrikula A. 52-297 ho diresaun husi Laga-Baguia rezulta vitima hetan kanek todan iha rentos no mamik nakfera, tanba hetan pankada makaas husi volante motorizada.
“Asidente neebe akontese iha loron 2 liu ba iha laga nee ita haree faktor umanu, tanba nia halai ho velosidade lakonsege trava soke duni truk nee, matebian la konsege salva tanba grave,” informa Komandante Komando Polisia Munisipiu Baukau, Superintendente Xefe Polisia, Antonio Maria De Sa ba jornalista sira, iha Vila Nova, Tersa (29/10/2024).
Hafoin asidente nee akontese, parte Seksaun Tranzitu husi Komando Polisia Munisipiu too kedas fatin akontesimentu hodi evakua vitima sira ho karreta ambulansia ba Hospital Rejional Eduardo Ximenes (HoREX) Baukau hodi halo tratamentu, maibe vitima lakonsege salva tanba hetan pankada makaas.
Nunee mos vitima nain ida seluk konsege hetan trantamentu no dadaun kondisaun rekopera, tanba hetan kanek kamaan.
“Tuir rekolha informasaun husi familia momentu nia aman rasik hateten ba nia halai neneik, mais foinsae hakarak halai lalais prontu situasaun sai hanesan nee,” dehan nia.
Entretantu evidensia hanesan motorizada no karreta truk dadaun, Komando Polisia Munisipiu Baukau asegura hela hodi prosesu ba oin.
(EST 2)
