DILI, STLTIMORLESTE.com – Joven mak futuru nasaun no sei troka lider tuan sira, tanba nee kontinua mantein estabilidade no hadook aan husi hahalok krime sira.
Lia hirak nee hatoo husi Feto Potensial, Maria Amaral ba STL iha nia knaar fatin Kaikoli, Kuarta (16/11/2024).
Nia hatete, tuir nia haree ohin loron joven sira hahu hatudu ona sira nia matenek iha sosiedade, no fatin sira ladun ona iha problema tanba joven maduru ona.
“Tanba nee husu kontinua ho hahalok hirak nee, tanba halo krime no violensia sei la manan buat diak ruma. Husu atu mantein pas no presiza kapasita aan liu husi formasaun oin-oin, tanba futuru nasaun iha joven sira nia liman, ohin loron lider tuan mak kaer ukun maibe ba futuru joven mak sei kaer nasaun, tanba nee prepara aan hahu agora,” katak nia.
Nia hatutan, kontinua pas iha sosiedade no nafatin kapasita aan ho formasaun oin-oin hodi hasae abilidade, nunee hasae konhesimentu.
Nunee mos Segundu Sekretaria iha Embaixada Timor Leste akredita ba Filipinas, hanesan Diplomata, Helena Maria Soares de Lima hatoo mensajen ba iha joven sira iha Timor laran tomak katak, presiza estuda nunee sai ema neebe mak profisional iha futuru.
“Hau nia mensajen ba alin sira, daudaun imi hotu iha hela faze ida buka imi nia identidade uza tempu ho wisely, nicely, neineik no kalma. Lori aan took hanesan joven ida produtivu ho ida nee loron ikus ita bele sai profisional no labele haluha tenke iha fé, piedade, integridade no serenidade,” katak nia.
Mensajen ba iha feto sira hotu katak, ema hotu hanesan kriatura Maromak nia, tanba nee hasoru saida deit tenke barani lao ba oin.
(eme)
