DILI, STLTIMORLESTE.com – Joven mak futuru ba nasaun, tanba nee husu atu nafatin hasae konhesimentu, abilidade ho atitude neebe pozitivu, nunee bele fo impaktu diak ba nasaun.
Lia hirak nee hatoo husi Caetano Jose Freitas hanesan mos Funsionariu Publiku iha Gabinete Pro-Reitoria Dezenvolvimentu Infrastrutura UNTL, iha Departamentu PMU (Project Management Unit) ba STL telefone, Segunda (14/10/2024).
Nia hatete, joven mak futuru ba nasaun, tanba nee presiza prepara aan ho matenek, hatudu nafatin atitude neebe diak, nunee futuru bele kontribui ba rai nee ho prosperu.
“Ba juventude nasaun nian, hanoin katak futuru iha ita nia liman rasik. Laiha susesu bainhira laiha servisu makaas, no laiha mehi ida neebe sai realidade bainhira laiha preparasaun. Mundu kontinua muda lalais, no so sira neebe mak preparadu no persistente mak sei tahan no lao ba oin,” katak nia.
Nia hatutan, labele tauk atu aprende, koko no sakrifika aan ba mehi sira. Dezafiu hotu-hotu mak oportunidade ida atu buras, no falhansu hotu-hotu mak lisaun ida neebe iha valor.
Iha biban nee, nia mos husu feto sira nafatin esforsu aan hodi lao ba oin nunee bele lori mudansa iha futuru, tanba feto iha kbiit estraordinariu. Nunka laran rua-rua atu koko no luta ba futuru ida neebe diak liu.
Nunee mos Akademista Judite Ximenes hatete, ohin loron sei ukun husi jerasaun tuan sira, maibe ba oin jerasaun foinsae sira mak sei kontinua, tanba nee husu nafatin prepara aan liu husi aprende no hasae abilidade sira.
“Joven mak kontinuador ba oin, se bainhira jerasaun tuan sira laiha ona joven sira mak sei kontinua lori rai nee ba oin, tanba nee mak nia husu ba jerasaun foun liu-liu foinsae sira tantu feto no mane nafatin aprende buat diak ruma nunee aban bainrua bele lori rai nee lao ba oin,” katak nia.
Nia hatete, presiza hadook aan husi hahalok violensia sira no hadook aan husi droga, maibe oinsa mak prepara aan no fo aan hodi estuda nunee aban bainrua bele troka lider tuan sira hodi lori rai nee ba oin.
(eme)
