BAUKAU, STLTIMORLESTE.com – Joven sira neebe mehi atu kompete vaga Nova Zelandia balu sente triste, tanba atendimentu iha edifisiu Dirasaun Munisipal Konservatoriu Servisu Rejistu Notariadu Baukau lao lentu.
Tuir Joven Joela da Costa Soares katak, nia parte prezensa iha edifisiu Notariadu Baukau iha loron Kuarta nee, nia parte submete dokumentus atu atualiza sertidaun nasimentu, bilhete identidade no bom komportamentu, maibe too ohin loron seidauk rezolve, tanba tuir informasaun neebe nia parte hetan husi funsionariu sira katak sistema la lao.
“Nee fo impaktu ba ami, tanba vaga nee loron ohin deit ona, ami tauk ema taka tiha entaun ami la apply ona. Ami hein deit oportunidade vaga nee mak dadersan deit ami mai tiha ona too loraik maibe tarde nee mak ami sente laran triste loos,” hateten Joela ba STL iha resintu Notariadu Baukau, Sesta (12/09/2025).
Nia sublina, aleinde trata dokumentus sira hanesan bilhete identidade, sertidaun nasimentu no bom komportamentu tarde iha edifisiu Notariadu Baukau, nia mos prekupa kona-ba atendimentu pasaporte nian, tanba razaun Notariadu Baukau fo sai regras atendimentu pasaporte nian sei funsiona fali iha loron Segunda semana oin.
Nia argumenta, atendimentu Notariadu Baukau nian neebe lentu fo impaktu ba joven sira neebe iha inisiativa atu konkore vaga Nova Zelandia, tanba loron 12 Setembru 2025 loron ikus ba vaga Nova Zelandia nian, maibe joven barak iha Munisipiu Baukau seidauk atualiza hikas dokumentus sira hanesan bilhete identidade, sertidaun nasimentu, bom komportamentu no pasaporte.
“Pasaporte mos kriteria Nova Zelandia nian ami pasaporte laiha neebe ba iha Dili mos ema atrian depois online tempu, vaga Nova Zelandia nian mos limitadu tebes, maibe iha Notariadu Baukau urjente mos dehan labele, tanba dehan loke iha Segunda,” katak Joela.
Nunee mos Joven Nelson komenta, prezensa iha edifisiu Notariadu Baukau hahu kedas iha loron Kuarta semana nee, tanba atu trata dokumentus hanesan atualiza bilhete identidade, sertidaun nasimentu no bom komportamentu, maibe too ohin loron seidauk iha rezultadu, tanba razaun sistema la lao.
“Tarde nee laos sira ketik nee mak tarde, maibe sira nia razaun mak sistema falha, falha duni ga lae ami la hatene, maibe sira dehan sistema mak falha,” Nelson haktuir.
Joven nee la fiar sistema iha Notariadu falha, tanba atualiza no trata bilhete identidade lao diak hela, maibe difisil deit mak iha sertidaun nasimentu, bom komportamentu no seluk tan mak pasaporte.
“Saida mak BI diak sertidaun RDTL la diak loron-loron fali nee,” nia konta ho hirus.
Liga ho asuntu nee STL tenta konfirma Diretora Dirasaun Munisipal Konservatoriu Servisu Rejistu Notariadu Baukau, Justinha Das Neves Mendonça maibe lakohi fo komentariu.
Jornalista: Tomas Reis
Editora: Domingas Gomes
