DILI, STLTIMORLESTE.com – Dala barak ema dehan joven tenke barulhu, maibe hanesan era ida agora nee joven barulhu maibe barulhu ida oinsa. Barulhu ba buat neebe diak, barulhu neebe mak halo ema seluk kontenti, no haksolok ho joven sira prezensa iha sira nia leet.
Liafuan nee informa husi Treinadora Grupu Dansa Kultural Kakuluk nomos Joven bá Kristu Parokia Aimutin, Aliansa Auxiliadora bá STL iha Fatuhada, Sesta (27/03/2026).
Nia dehan, nudar joven sira keta laran taridu no senti tauk no lakon esperansa, nafatin sai joven neebe kreativu no inovativu. Tanba dala barak ema dehan joven mak barulhu, maibe hanesan era ida agora nee joven barulhu maibe barullu oinsa lai.
“Barulhu bá buat neebe diak, barulhu neebe mak halo ema seluk kontenti no haksolok ho ita nia prezensa iha sira nia leet,” dehan nia.
Tuir nia, nudar joven keta lakon esperansa no lakon vontade, maibe nafatin halo orasaun bá Nai Maromak, tanba Nai Maromak sei haraik buat neebe joven senti labele sei sai bele importante nafatin halo orasaun iha moris lor- loron.
Nia katak, nia nuudar grupu joven bá kristu iha Parokia Aimutin nomos hanesan treinadora iha grupu dansa kultural nian ho naran kakuluk neebe sira husi grupu joven bá kristu rasik mak harii iha 2024.
Tanba iha grupu joven bá kristu nee iha atividade oioin liu-liu hanesan bainhira halo konferensia ruma presiza orsamentu hodi ajuda bá atividade nee, tanba nee mosu inisiativa husi grupu joven bá kristu Parokia Aimutin nian hodi kria grupu dansa kultural Kakuluk, hodi bele hetan osan bainhira iha konvite ruma.
“Ami nia grupu kakuluk harii iha 2024, iha momentu neeba. Antes atu kria grupu nee ami dansa iha grupu joven bá kristu Parokia Aimutin nian. Maibe depois tempu lao dadauk bainhira hetan konvite husi liur, labele lori grupu joven bá Kristus nak reprejenta, tanba nee comum liu. neemak mosu hanoin hodi kria grupu dansa kultural nee ho naran Kakuluk,” esplika nia.
Nia afirma, grupu kakuluk nee rasik akumula husi joven barak, no dansa nee konsep no modifika husi grupu rasik liu husi maun boot naran Abraun.
Fofoun hola parte iha dansa nee ema nain 10, maibe agora sira la ativu hotu ona tanba iha atividade seluk.
“Agora daudaun iha grupu dansa kultural nee ami hamutuk ema 20 hanesan nee. Bainhira simu konvite ruma husi Parokia ka husi liur, tanba ida-idak ho nia atividade entaun husi nain 20 nee fahe malu hodi treinu dansa,” nia dehan.
Entretantu objetivu husi grupu dansa kultural neemak nudar joven hakarak promove kultura dansa tradisional TL nian neebe puru. Iha grupu nee nia dansa laos kultura modernu maibe dansa kultural neebe puru. Agora nee modernu neebe grupu ka sangar kultura barak dansa ba modernu ona, mais iha grupu nee dansa kultural neebe puru TL nian. Hanesan dansa kultural husi Lospalos nian, entaun dansa duni ida puru nee.
“Ami nia dansa nee dala barak dansa neebe tradisional duni. Proezemplu hanesan dansa tradisional Lospalos nian, ami sei dansa duni tradisional nian no ami sei la kahur ho modernu nian. Tanba ami lakohi atu halakon kultura Timor nian ida neebe lolos nee,” katak nia.
Nia esplika, iha grupu kakuluk nee aleinde dansa kultura iha mos kanta, banda, puizia nomos drama. Bainhira atu halo aprejentasaun ruma, depende bá konvite neebe fo mai, sekarik konvite nee husu drama, entaun grupu tenke prepara drama, neebe depende bá konvite nee deit.
Nia hatutan, membru sira neebe iha grupu dansa kultura nee maioria mai husi joven bá kristu no labarik labarik bá Kristu Parokia Aimutin nian hotu.
(dom)
