DILI, STLTIMORLESTE.com – Joven sira presiza kaer metin mensajen Sua Santidade Papa Francisco, neebe husu hadomi malu no hakbesik aan ba Maromak.
Madre Superiora husi Kongregasaun ALMA, Madre Florensia Nebo Hokeng dehan, joven sira nafatin kaer metin mensajen husi Sua Santidade Papa Francisco, bainhira vizita Timor Leste iha tinan kotuk, husu hadomi malu no hakbesik aan ba Maromak.
“Mensajen ba joven sira hotu, hanesan ita hotu hatene iha tinan kotuk Sua Santidade Papa Francisco mai TL, nia kontente no antuasismo hodi hasoru joven sira, no mensajen ba joven sira mak hadomi malu no hadook aan husi asaun violensia sira,” katak Madre nee ba STL iha nia knaar fatin Pantai Kelapa, Kuarta (10/09/2025).
Nia hatete, labele hadook aan husi Maromak no labele hadook aan husi atividade igreja, maibe hakbesik aan ho Maromak, nunee mensajen neebe hatoo husi Sua Santidade Papa sai bukae ba joven hodi implementa iha futuru.
Nunee mos Madre Izaura do Ceu Soares husu ba joven sira hadok aan husi violensia, no hadomi malu no hakbesik aan ba igreja.
Nia afirma, joven sira tenke hadook aan husi violensia, maibe hakbesik aan ba igreja no involve aan ba grupu sira neebe motiva joven sai joven diak.
Nunee mos Madre Asti Soares husi Kongregasaun Alma, husu joven sira nafatin sai maduru iha sosiedade, nasaun no ba igreja.
Nia hatutan, joven neebe maduru laos ho matenek kakutak deit, maibe matenek ho fuan hodi oinsa bele lidera aan lao ba dalan neebe los no hadok aan husi hahalok aat sira.
Jornalista: Emerenciana Pinto
Editora: Domingas Gomes
