DILI, STLTIMORLESTE.com – Prezidente Asosiasaun Majistradu Judisial, Antonino Gonsalves aseita ho planu Governu nian neebe atu halo kontratu ba Juiz Internasional, Prokurador no Defensor Publiku hodi apoiu servisu Tribunal nian, maibe iha kontratu mak tenke klaru, atu sira servisu tuir lei.
“Tribunal tenke funsiona, ita kestiona beibeik menus rekursu umanus, solusaun mak kontratu Juiz Internasional sira, sira mai servisu tuir ita nia lei, laos tuir fali sira nia lei, se sira viola ita nia lei haruka fila,” dehan Antonino ba STL iha nia knaar fatin Kaikoli, Dili, Tersa (18/02/2025).
Nia hatutan, sira kuandu mai Timor integra ona hanesan Juiz Timor, atu bele ajuda mos Tribunal hodi redus prosesu sira.
Tanba numeru Juiz menus, prosesu pendente, iha dekretu lei numeru 1/2017 de 18 Janeiru aprova ona atu rekruta Juiz sira neebe laos Timor, atu mai halao servisu iha Tribunal Rekursu, Tribunal de Kontas no mos fo mentoria ba Juiz sira iha Tribunal Primeira Instansia.
Maibe importante mak rekrutamentu ba Juiz Internasional sira tenke iha nia argumentu no sira nia kompetensia tenke klaru.
Nia fo ezemplu, atu halao servisu iha Tribunal Rekursu laos Juiz sira halao servisu kleur ona iha Tribunal Primeira Instansia foti deit haruka ba labele, tenke halo selesaun ho diak. Tanba iha Tribunal Rekursu julga fali desizaun primeira instansia nian, tau Juiz iha neebe hatene lian portugues atu apresia desizaun sira, ida nee presiza duni Juiz Internasional sira hodi ajuda.
Iha fatin ketak, Jurista Jose Maria Guterres dehan, planu Governu nian diak, maibe liu husi rekezitus ida.
“Liu husi rekezitu ida atu Juiz sira nee mai, halao servisu tuir kontratu neebe iha, kuandu too tempu ida kontratu termina sira bele fila ona,” dehan nia.
(ter)
