DILI, STLTIMORLESTE.com – Jurista Timor oan konsidera katak, tempu ona atu harii Supremu Tribunal Justisa (STJ), no tuir lei iha ema nain hitu (7) mak sei ba tuur iha neeba.
“Atu tuur ka sai Juiz iha STJ kompostu husi Juiz nain 7, pelo menos nain 4 husi juizes kareira, restante husi Majistradu Ministeriu Publiku no juristas konforme artigu 30 numeru 1 husi lei organizasaun judisiaria,” dehan Jurista Sergio Dias Quintas ba jornalista STL iha Kaikoli, Kinta (08/01/2026).
Nia argumenta, Prezidente Tribunal Rekursu tau ona iha prioridade hodi estabelese Supremu Tribunal Justisa iha tinan 2026, espera katak politika ida nee bele implementa.
Kona-ba Supremu Tribunal Justisa nia knaar tuir lei numeru 25/2021 iha artigu 28 numeru 1 dehan katak, Supremu Tribunal Justisa apenas konhese konaba materia ba direitu, nee signifika katak STJ halo julgamentu kona-ba materia direitu, tantu direitu sivil no penal.
Nia dehan, iha numeru 2 dehan katak, Supremu Tribunal Justisa administra justisa kona-ba materia neebe ho nutureza konstitusional no eleitoral.
Iha fatin ketak, Akademiku UNTL, Rafael de Jesus dehan, Juiz no Majistradu sira neebe sei tur iha STJ, tenke independente atu halao servisu tuir lei haruka.
“Se deit mak sei tur iha STJ importante mak halao servisu ho independente, hodi lori justisa lao ba oin, tanba ohin loron ema balu sei halerik ba justisa neebe iha,” dehan nia.
Nia afirma, espera Juiz sira neebe halao knaar iha STJ sei halao servisu hakruk ba regra neebe iha, no servisu tuir lei haruka atu fo justisa ba ema hotu ho justu.
Reportajen: Terezinha De Deus
