DILI, STLTIMORLESTE.com – Relasiona ho publiku balu nia preokupasaun kona-ba kapasidade Juiz sira nian, tanba nee mak sujere atu Juiz sira kuandu simu prosesu tenke lee husi pajina primeiru too hotu.
“Juiz tenke lee prosesu hau hateten bebeik ona, Juiz tenke loron-loron lee, nia simu prosesu tenke lee husi pajina ida too ikus atu bele domina prosesu. Se nia lee deit akuzasaun, akuzasaun bele sala hela nia julga hela ida nee labele,” dehan Prezidente Asosiasaun Majislatura Judisial, Antoninho Gonçalves ba STL iha nia knaar fatin Kaikoli, Kuarta (09/04/2025).
Nia hatutan, Juiz tenke lee prosesu halo didiak hodi evita problema sira akontese hanesan ikus nee.
Antoninho mos konsidera, Tribunal Dili hanesan Tribunal ida neebe akomula prosesu boot, komplikadu no mediatiku, tanba nee husu atu konselhu bele haree, oinsa bele nomeia Koletivu ida espesial hodi kaer prosesu sira neebe komplikadu.
Esplika, Juiz balu iha kapasidade ho malae hanesan, tanba nee konselhu atu nomeia bele rona husi inspetor sira, tanba durante nee inspetor sira mak halo avaliasaun no sira hatene klean kona-ba Juiz neebe iha kapasidade diak. Ho nunee rona husi inspetor, konselhu bele nomeia Koletivu espesial ida atu atende deit prosesu sira neebe komplikadu.
Iha fatin ketak, Jurista Jose Maria Guterres dehan, Juiz sira iha papel importante tebes atu halao servisu tuir regra neebe iha.
“Juiz sira halao servisu tuir regra neebe iha, tanba knaar Juiz nian importante atu tesi lia ba ema hirak neebe buka hela justisa,” dehan nia.
Hatutan tan, hanesan Timoroan tau konfiansa ba iha Juiz Timoroan sira atu halao servisu ho diak liu tan, hodi lori justisa ba ema hirak neebe buka hela justisa.
(ter)
