DILI, STLTIMORLESTE.com – Juiz Timoroan balu iha kapasidade atu sai inspetor, maibe tenke liu husi prosesu ida.
Liafaun nee haktuir husi Prezidente Asosiasaun Majislatura Judisial Timor Leste (AMJTL), Antoninho Gonsalves ba STL iha Kaikoli, Segunda (25/08/2025).
“Sai inspetor nee tenke hanoin katak, hau nee imparsial ema barak mak sei la gosta hau. Desizaun neebe hau foti halo ema balu la gosta, agora ita seidauk bele maibe iha Juiz ida ka rua iha kapasidade,” dehan nia.
Nia hatete, iha Juiz ida rua iha kapasidade ona, maibe tenke loke konkursu se maka liu bele ba, no primeiru tenke servisu hamutuk ho inspetor malae nian, depois haruka ba servisu iha Inspetor Portugal nian haree inspesaun lao oinsa bele to fulan 6 ka tinan 1, depois fila mai Timor nia bele asumi fali knar Inspetor no ida malae nian bele ba fali asessor.
Nia esplika tan, atu sai inspetor tenke preparadu tuir formasaun, no haree iha Juiz Timoroan balu iha kapasidade atu bele sai inspetor, maibe tenke liu husi faze ida labele foti tau deit ba.
Iha fatin ketak, Prezidente Tribunal Rekursu, Afonso Carmona dehan, inspetor ida fila ona, tanba nee sei halo fali kontratu ba inspetor ida.
“Inspetor ida fila tiha ona, tanba nee ita halo fali kontratu ba ida sei mai fali iha loron 1 fulan Setembru. Ita servisu hamutuk ho Portugal hau hanoin hela karik sira la suporta, ita hola dalan seluk Timor oan mos bele sai Inspetor, maibe ida nee fila fali ba ita sei hare resposta husi Portugal nian,” dehan nia.
Caramona hatutan, inspetor nia servisu maka atu halo avaliasaun ba Juiz sira nia servisu, atu hare Juiz neebe maka merese hodi sae klasse, hanoin sei enkaixa kedan ho Timor oan ida atu nia mos bele estuda, maibe husi KSMJJ mak sei termina.
(ter)
