DILI, STLTIMORLESTE.com – Lei fo dalan atu Juiz Timoroan bele sai hanesan inspetor, tanba iha Estatutu Majistradu Judisial define ona.
Tuir Prezidente Asosiasaun Majislatura Judisial, Antoninho Gonçalves katak, estatutu fo dalan atu Juiz Timoroan bele sai mos asesor, tanba nee husu atu prepara hahu agora.
“Hau hanoin lei fo dalan, maibe ita tenke prepara hahu agora, tanba sai inspetor nee atu avalia fali kolega Juiz sira nia prosesu,” dehan Antoninho ba jornalista STL iha nia knaar fatin Kaikoli, Dili, Tersa (15/04/2025).
Nia hatutan, Konselhu tenke hanoin ona kona-ba ida nee, atu oinsa prepara ho didiak, tanba sai inspetor laos servisu ida neebe fasil.
Iha fatin ketak, Jurista Sergio Dias Quintas dehan, lei fo dalan ba Timoroan bele sai hanesan inspetor.
“Lei fo dalan ba Timoroan bele sai hanesan inspetor, tanba iha estatutu Majistradu Judisial define katak, bainhira sai inspetor tenke prienxe rekezitu balu,” dehan nia.
Nia dehan, ida mak tenke mai husi klase mais elevada, signifika primeira klase, entaun karik Juiz Timoroan neebe iha ona primeira klase, no iha ona abilidade ba servisu inspetoria mak Konselhu Superior Majistradu Judisial bele nomeia nia ba inspetor.
(ter)
