DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial JS hanesan aman, tanba komete krime hasoru lezadu inisial MO hanesan oan mane rasik.
Tuir faktus katak, iha loron 11 fulan Novembru tinan rua liu ba, arguidu lori liman basa iha lezadu nia hasan dala ida.
Konsekuensia husi arguidu nia hahalok nee, halo lezadu sente moras hodi ikus mai ba iha Pradet.
Motivu husi problema nee, tanba deit lezadu baku nia alin tanis, ho ida nee mak halo arguidu nervozu hodi baku lezadu.
Konsekuensia husi arguidu nia hahalok nee, halo lezadu sente moras. Tanba nee MP akuza arguidu komete krime Violensia Domestika ho forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun nee arguidu deklara katak, momentu neeba iha oras meudia lezadu toba hela, tanba nee mak lezadu nia alin ba fanu lezadu atu ba eskola, maibe lezadu baku fali nia alin, ho ida nee mak lezadu nia alin mai fali fo hatene ba arguidu.
Arguidu deklara, ho ida nee mak halo arguidu nervozu hodi lori liman basa dala ida ba iha lezadu.
Tribunal konfirma ba iha lezadu, no lezadu deklara katak sira hela hamutuk iha uma ida, arguidu mak servisu hodi fo han sira.
Lezadu deklara, arguidu basa dala ida kona iha lezadu nia hasan, tanba momentu neeba lezadu lakohi ba eskola.
Rona tiha arguidu no lezada, Tribunal husu atu tama ba iha alegasaun final.
Iha alegasaun nee Prokuradora deklara katak, arguidu lori duni liman basa lezadu, tanba nee husu Tribunal atu aplika pena multa neebe kmaan.
Alende nee, defeza mos aseita ho pedidu Ministeriu Publiku nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Jose Escurial, Ministeriu Publiku reprezenta husi Prokuradora Estajiada, arguidu hetan asistensia legal husi Defensor Publiku Manuel Amaral.
(ter)
