DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime ofensas ba integridade fizika simples, neebe komete husi arguidu inisial PB hasoru lezada inisial ORS nuudar feen.
Tuir akuzasaun katak, iha loron 15 Outubru 2025, iha Santa Cruz, Dili, iha momentu neeba arguidu uza kapasete hodi baku kona dala rua iha lezada nia ulun parte kotuk, uza mos sinelus hodi baku kona iha lezada nia rentos kauza moras.
Motivu husi problema nee tanba lezada husu ba arguidu katak, tanba saida o lanu no hemu tua iha neebe.
Hahalok arguidu nia bebeik ona, maibe lezada foin primeira vez halo keixa hasoru arguidu.
Konsekuensia husi arguidu nia hahalok nee mak halo lezada sente moras iha ulun fatuk parte kotuk no rentos, tanba hetan baku ho kapasete no sinelus husi arguidu.
Arguidu halo ho forma livre, deliberada no konsiente, hatene momos (ben sabendo) katak, uza kapasete no sinelus hodi baku iha lezada nia ulun no rentos.bele kauza moras, maibe arguidu halo nafatin nia hahalok nee hanesan meius no instrumentu ida neebe mak aptu no adekuada.
Arguidu mos hatene hela katak, nia hahalok sira nee proibidu tuir lei penal.
Tanba nee konstitui arguidu PB hanesan autor material ba pratika krime ofensas ba integridade fizika simples, tuir artigu 145 no. 1 CP, ho Referensia ba Lei no 7/2010, haktuir ba artigu 2,5, ba Krime Violensia Domestika.
Iha sala julgamentu arguidu PB konfesa katak, faktus sira neebe Ministériu Públiku imputa ba arguidu nee loos hotu.
Arguidu deklara, problema nee mosu iha uma Santa Cruz, tanba arguidu lanu hela, nunee arguidu lori helem tuda lezada.
Hafoin problema nee akontese arguidu ho lezada diak malu fali no moris hamutuk too agora.
Aleinde nee lezada deklara katak, arguidu baku helem kona-ba iha lezada nia ulun sente moras, tanba nee lezada ba keixa iha PSIK.
No liu tiha loron ida lezada no arguidu diak malu fali too agora.
Lezada deklara, too agora arguidu lanu nafatin, maibe la baku ona lezada.
No iha alegasaun Ministeriu Publiku husu Tribunal atu kondena arguidu ba pratika krime simples ho pena multa hanesan kastigu ida, atu iha futuru arguidu labele komete tan.
No defeza husu Tribunal atu aplika pena multa ba arguidu tuir arguidu nia ekonomia.
Hafoin rona tiha deklarasaun sira nee, Tribunal deside muda ba loron 6 fulan Marsu, tuku 10, hodi rona desizaun.
Iha audensia julgamentu nee prezide husi Juiz singular, José Escurial, Ministeriu Publiku reprezenta Prokuradora estajiaria nain-ida no arguidu hetan asistensia legal Defensor Publiku nain ida.
(ter)
