DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial VO hanesan laen, neebe komete krime hasoru ofendida inisial AS hanesan feen.
Iha indisus sufisiente katak, iha loron 3 fulan Outubru tinan 2024, haleu oras tuku 07:30 OTL., iha Lahane Oriental, Dili, arguidu VO lori liman liki kona iha ofendida nia matan sorin los no iha oras 12:00 OTL arguidu lori liman tuku dala ida kona iha ofendida nia tilun hun sorin karuk.
Konsekuensia direta husi arguidu nia hahalok ofendida hetan moras iha tilun sorin karuk no bubu.
Kauza husi problema nee, tanba iha fulan Setembru sira nia oan mane boot uza arguidu nia telemovel hodi nonton tpo telemovel monu rezulta layar nakfera, nee mak arguidu husu osan atu hadia, maibe ofendida dehan osan laiha.
Arguidu halo ho forma livre deliberada no konsientemente, hatene katak lori liman liki kona iha ofendida nia matan sorin los, no iha oras 12:00 OTL arguidu lori liman tuku dala ida kona iha ofendida nia tilun hun sorin karuk, nuudar meiu neebe aptu hodi hamosu ofensa ba ofendidu nia isin lolon no saude.
Arguidu hatene katak nia konduta nee proibi no punidu tuir lei penal, tanba nee konstitui arguidu nuudar autor material ho forma konsumadu ba pratika krime ofensa ba integridade fizika simples ho forma violensia domestika ida, prevista no punidu tuir artigu 145 husi Kodigu Penal konjuga ho artigu sira 2, 3 alinea a) no artigu 350 alinea b) husi Lei Kontra Violensia Domestika numeru 07/2010, loron 07 fulan Julhu.
Hatan ba akuzasaun nee arguidu konfesa ba faktus katak, momentu neeba akontese duni problema, no arguidu halo duni agresaun ba lezada.
Arguidu deklara, depois akontese tiha problema sira diak malu fali, hahu husi neeba mai too agora la iha tan problema ona, no arguidu arepende tebes ba nia hahalok nee, promete sei la halo tan iha futuru.
Lezada mos reforsa tan akuzasaun neebe iha katak, arguidu halo duni agresaun hasoru lezada, tanba nee mak lezada sente la diak hodi ba hatoo keixa.
Lezada deklara tan, hahu husi neeba mai too agora la iha tan problema ona, sira diak malu ona no kontinua moris hamutuk hanesan feen no laen.
Rona tiha arguidu no lezada, iha alegasaun Ministeriu Publiku husu Tribunal atu aplika pena multa ba arguidu, aleinde nee defeza mos konkorda ho pedidu MP nian.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husi Defensor Publiku Manuel Sarmento.
(ter)
