DILI, STLTIMORLESTE.com – Tribunal Judisial Primeira Instansia Dili kontinua halao hela programa julgamentu movel ba iha munisipiu neebe pertense mai iha area Jurisdisaun Tribunal Dili nian, hanesan Ermera, Aileu, Likisa no Atauro.
Tuir Juiza Administradora Tribunal Dili, Edite Palmira katak, julgamentu movel nee planu antes no Juiz Koletivu ba hotu.
“Julgamentu movel Juiz Koletivu ba hotu, laos Juiz ida naran marka dehan ba halo julgamentu iha foho, maibe ida nee iha tiha ona despaisu atu regula,” dehan Edite ba jornalista sira iha Tribunal Dili, Sesta nee (4/04/2025).
Nia fo ezemplu, koletivu iha haat, fulan nee sira bele ba iha semana nebe deit, no sira ba nee ba kedan semana ida, sira ba minimu nee lori prosesu 30.
Tanba ida nee iha efeitu duni atu halo redusaun, tanba sira ba ona hela iha munisipiu hodi halo desizaun iha neba, tanba sira ba lori ho komputador no printer lori hotu, no desizaun sira bele fo kedan, ida nee atu ajuda diminui prosesu, atu lori justisa hakbesik ba povu.
“Ita nia infraestrutura sira dala ruma la permite ita nia ema sira iha area remotas labele sae kareta too mai Dili, tanba nee Juiz sira iha sira nnia planu konbina malu iha prosesu singular no koletivu sira ba halo julgamentu,” dehan nia.
Iha fatin ketak, Jurista Jose Maria Guterres dehan, julgamentu movel hanesan planu neebe diak, hodi lori justisa hakbesik ba iha komunidade sira.
“Hanesan planu neebe diak hodi lori justisa hakbesik ba iha komunidade sira, tanba ohin loron komunidade balu hela dook susar asesu ba justisa liu-liu mai too iha Dili, tanba nee planu Juiz sira nian nee diak ba halo deit julgamentu iha munisipiu sira,” dehan nia.
Jurista nee informa, julgamentu movel hanesan meius ida neebe diak lori justisa besik ba iha komunidade sira, tanba iha prosesu balu dala ruma Tribunal adiamentu tanba parte balu la mai ho distansia dook, haree mos ba iha finanseru gastu selu kareta, tanba nee se julgamentu iha munisipiu bele deham diak liu, tanba lori justisa ba besik iha komunidade sira.
(ter)
