BAUKAU, STLTIMORLESTE.com – Inisiu fulan Junhu too Dezembru 2024, Delegasaun Territorial Florestal Kafe, Plantasaun no Industria Munisipiu Baukau rejistu kazu ai ilegal hamutuk 11 no prende kilat manu 8.
“Kazu tula ai neebe mak ilegal iha hau nia tempu hatama dala 11, neebe ita prende mai husi Suku no mai husi munisipiu ida ba munisipiu seluk,” informa Xefe Departementu Delegasaun Territorial Florestal Kafe Plantas Industria Munisipiu Baukau, António Jose Lopes ba jornalista sira, iha Vila Antiga, Tersa (17/12/2024).
Nia dehan, kazu tula ai ilegal refere balun tula husi Munisipiu Lautem, Vikeke no balun tula husi suku sira iha Munisipiu Baukau ba Postu Baukau Vila, maibe liu husi patrolhu ekipa florestal konsege prende, tanba ai neebe sidadaun sira tula, durante tesi hodi tula la iha karta konhesimentu.
Ai sira neebe sidadaun sira tula hodi ekipa prende, maioria ai protejida sira hanesan ai teka no seluk tan neebe deskonfia faan ba karpintaria sira no seluk tan mak ai sunu atu faan iha merkadu.
Husi kazu 11 daudaun parte florestal aprezanta ona ba Ministeiru Publiku neebe aplika ona koima husi US$ 25.00 ba leten tuir kategoria infrasaun.
Aleinde kazu ai ilegal, parte Florestal Baukau liu husi ekipa patrulha husi fulan Junhu too Dezembru nee, prende mos kilat manu husi sidadaun sira neebe halo kasa hamutuk 8 iha area juridiku Baukau.
No tuir investigasaun ba kazu ilegal 11 no kilat 8, Antonio deklara, sidadaun sira seidauk hetan informasaun kona-ba bandu tesi ai arbiru no bandu uza kilat manu hodi kasa animal fuik sira iha ai laran.
Nunee parte Delegasaun Territorial Florestal Baukau hahu esforsu liu husi siensibilizasaun neebe implementa ona iha kada Postu Administrativu sira iha Munisipiu Baukau neebe hetan partisipasaun husi Autoridade Suku sira hodi kontinua desimina ba nia sidadaun sira iha nivel suku.
Tanba Estadu Timor Leste antes nee implementa ona lei sira atu sidadaun sira labele tesi ai no sunu rai arbiru inklui kasa animal fuik sira iha ai laran.
(EST 2)
