BAUKAU, STLTIMORLESTE.com – Administrador Postu Kelikai Antigu, Fransisco Matias Gusmão “Junior” sei kore problema infraestrutura bazika husi komunidade sira iha Kelikai Antigu, Munisipiu Baukau.
Nia esplika, knaar Administrador Postu neebe Governu liu husi Ministeriu Administrasaun Estatal atribui nee previlejiu, maibe mos responsabiliza boot ba Postu Administrativu neebe estabelese ho inisiu andamentu inisiu ho zero, tanba nee sei servisu ho estrutura Suku 5 nian hodi lori prosesu ba oin, neebe tuir planu sei avansa ho problema infraestrutura bazika.
“E jatamente, hanesan Autoridade Postu infraestrutura bazika nee ita la diskuti, liu-liu liga ba bee moos no eletrisidade neebe komunidade balun seidauk asesu nomos estrada ita sei tenta para povu sira nee bele sente dezenvolvimentu,” hateten Junior ba jornalista sira hafoin remata serimonia pose iha Vila Antiga, Kinta (13/12/2024)
Postu Kelikai Antigu iha Suku 5 ho nia Aldeia sira, maibe kada Aldeia komunidade balun seidauk asesu eletrisidade, tanba hela dook husi linha Eletrisidade.
Nunee mos bee moos, maioria komunidade seidauk asesu, liu-liu tempu bailoron difikulta tebes, tanba laiha bee matan neebe ho debitu boot besik komunidade sira atu asesu utiliza ba nesesidade, maibe komunidade sira sempre sosa no lao distansia dook hafoin asesu bee moos.
Inklui estrada husi Postu Laga ba Kelikai Antigu no estrada multi Suku no Aldeia sira iha Postu refere sei kondisaun aat no grave, nunee sei haree ba asuntu hirak nee.
“Neebe ba Administrasaun Kelikai Antigu maske foun, maibe nee laos dezafiu ba hau no sei fuan boot hasoru situasaun ida nee,” Junior argumenta
Maibe Administrasaun Postu Administrativu iha planu asaun anual no por anual, maibe sei simu ideias hotu husi Lider Komunitariu sira hafoin diskuti liu husi Asembleia Postu Administrativu hafoin desidi no sei aprezenta iha Autoridade Munisipal hodi kontinua diskuti iha Asembleia Konsultivu Munisipal hafoin fo solusaun.
Entretantu Postu Kelikai Antigu iha area 80km², kompostu suku 5 mak hanesan Suku Afaça, Abafala, Guruça Namanei no Uaitame ho total populasaun 5.998.
(EST 2)
