DILI, STLTIMORLESTE.com – Governu liu husi Junta Mediku Hospital Nasional Guido Valadares (HNGV) daudaun nee prosesa ona pasiente nain 30 resin neebe pendente durante nee nia dokumentu prosesa ona, hein ba halo tratamentu iha Hospital Singapura, Malazia nomos Indonezia.
“Pasiente pendente hau hanoin menus ona, tanba ami prosesa ona dokumentus sira nee kuaze nain 30 ami prosesu ona ninia dokumentus sira,” dehan Diretor Ezekutivu HNGV, Nuno Vital Soares ba jornalista sira iha nia knaar fatin HNGV, Tersa (11/03/2025).
Nia hatete, daudaun nee Junta Médiku Iha HNGV prosesa ona pasiente nain 30 resin nian dokumentus, depois fo fila-fali ba departamentu hotu no sei haree fila-fali kondisaun jeral ikus nian.
“Ita sei haree fila-fali pasiente nia kondisaun jeral ikus nian, para ita hatene, depois ita foin halo transferénsia, ” nia deklara.
Diretor nee esplika, pasiente sira neebe la halo transferénsia tanba situasaun Hospital Malazia, Singapura no Indonézia, tanba pasiente sira nee sei fo fali dokumentus mai, depois atu elabora fali sira nia dokumentus.
Iha fatin ketak, Familia Pasiente Julio Filipe da Costa informa, HNGV tenke deside lalais ona pasiente transferénsia ba rai liur, tanba pasiente lubuk ida mak sei hein halo tratamentu iha hospital rai liur.
(jen)
