DILI, STLTIMORLESTE.com – Prezidente Republika (PR) nomeia ona Juiz Afonso Carmona hodi troka Prezidente Tribunal Rekursu (PTR) Deolindo Dos Santos, tanba nia mandatu termina ona iha loron 29 fulan Abril tinan nee. Jurista sira husu ba iha PTR foun, atu administra justisa iha Tribunal Rekursu, hodi redus numeru prosesu pendente sira.
Tuir Jurista Alexandre Corte Real katak, PTR foun halao servisu ba liu liu haree ba kazu sira neebe pendente barak nee, se bele servisu ba atu redus kazu sira nee, tanba nee maka sai isu publiku konaba kazu pendente halo servisu diak atu lori justisa nee lao ba oin.
“Molok sai Prezidente nia mos sai ona hanesan Juiz Administrador, konaba jestaun administra justisa nee hau fiar nia bele halao, tanba nia esperiensia iha ona durante sai hanesan Juiz Administrador, hau nia mensajem administra didiak justisa iha Tribunal Rekursu hodi redus prosesu pendente, “dehan Alexandre ba STL, iha Kaikoli, Tersa (29/04/2025).
Nia hatutan, fo parabens tanba hetan fiar husi Prezidente da Republika, formalmente hetan ona pozisaun neebe Konstituisaun hatur ba, atu sai Prezidente Tribunal Rekursu laos buat ida neebe fasil, maibe hetan fatin nee hato parabens.
Carmona ema neebe iha kualidade, abtidaun makas sai Juiz tuir kareira neebe iha, husi UNTAET nia tempu sai Juiz ona, nia iha kareira Juiz tinan 20 ona tanba nee, iha esperiensia barak no sente haksolok banhira rona Juiz nee bele sai PTR. No estudu neebe halao laos mai husi Licensiatura deit, maibe ho Mastradu neebe mai husi Bali, sente kontente PR bele fo fiar hodi sai hanesan PTR durante mandatu tinan haat nia laran.
Konsidera Carmona, ema neebe humilde konaba profesional labele kestiona tanba durante tinan 20 sai Juiz ona, ema neebe koalia ho haraik an dedikativu no nakloke ba ema hotu.
Iha fatin ketak, Akademiku UNTL Rafael de Jesus dehan, husu PTR halao servisu ho imparsial, hodi lori justisa ba ema hotu.
“Husu PTR foun atu halao servisu ho imparsial, atu lori justisa lao ba oin, tanba ohin loron ema balu sei halerik ho sistema justisa neebe iha,” dehan nia.
(ter)
