DILI, STLTIMORLESTE.com – Jurista Timoroan konsidera katak, servisu Komisaun Anti Korupsaun (KAK) seidauk masimu.
“Servisu KAK nian durante nee hau haree ladun masimu, liu-liu iha parte investigasaun ita seidauk haree kazu konkretu ruma neebe KAK investiga hodi submete ba iha MinisteriuPubliku,” dehan Jurista Sergio Dias Quintas ba jornalista STL iha Kaikoli, Kuarta (16/07/2025).
Nia hatutan, servisu balu neebe KAK halo ita apresia, foin daudaun sira foti dadus too tama iha repartisaun publika, nee hatudu katak KAK nia imparsialidade hodi rekolha meio de prova.
Sublina, espera katak laos iha area investigasaun deit, maibe liu husi ida nee KAK tenke asumi nia papel importante ida mak, se karik nesesariu KAK tenke halo flagrante de delito ba suspeitu balu bainhira iha indisiu ruma ba krimi korupsaun.
Nunee bele hatudu katak irarkia KAK kaer metin prinsipu imparsialidade, se ida nee mak akontense ita hotu louva, no espera durante sira nia mandatu sira bele servisu ho meios balu hanesan nee, karik mak akontense ita sei apresia sira nia servisu, tanba hatudu rezultadu pozitivu.
Iha fatin ketak, Jurista Alexandre Corte Real dehan, too agora nia haree servisu KAK seidauk iha mudansa.
“Too agora nee hau haree seidauk iha mudansa ida, KAK nia servisu mak haree ba kazu sira neebe ho natureza korupsaun, tanba nee espera ba oin sira sei halao servisu diak liu tan,”.dehan Jurista.
Nia hatutan, espera ba oin KAK sei halao servisu diak liu tan, hodi haree kona-ba kazu sira neebe ho nia natureza korupsaun.
(ter)
