DILI, STLTIMORLESTE.com – Tribunal Rekursu (TR) halo hela fiskalizasaun abastrata kona-ba lei pensaun vitalisia neebe hatama husi eis titular sira, tanba nee TR tenke foti desizaun neebe justu, atu nunee labele hamosu problema iha rai laran.
“Poder judisial ka TR mos tenki hatene antes foti desizaun, tanba ita hotu hatene katak lei referida hetan revizaun iha Parlamentu Nasional tanba efeitu husi manisfestaun neebe afeta ba situasaun pais nian, tanba nee mak iha mudansa, TR nia desizaun labele hamosu fali problema foun iha pais ida nee,” dehan Jurista Sergio Dias Quintas ba ST,L iha Kaikoli, Dili, Kinta (11/12/2025).
Iha pais neebe deit tuir Sergio normalmente Tribunal nia desizaun atu rezolve problema, laos atu hamosu fali problema foun.
Tanba fiskalizasun abstrata neebe eis titular sira hatama hodi fiskaliza lei pensaun vitalisia nee, kabe direitu neebe norma Konstitusional fo garantia.
“Ita hotu hatene katak lei pensaun vitalisia nee nia ezistensia termina ona wainhira iha ona desizaun husi poder lezislativu, maibe tanba parte balu sei halo hela fiskalizasun abstrata maka prosesu sei lao hela. Poder lezislativu halo ona revizaun ba lei referida, tanba estudante universitariu sira halo manifestasaun forte hodi ezije hasai lei nee, tanba hamosu injustisa sosial entaun prosesu nee agora iha TR nia liman,” dehan Sergio.
Iha sorin seluk, Jurista Jose Maria Guterres dehan, kuandu husu fiskalizasaun abastrata ba iha Tribunal Rekursu (TR0, maka TR sei haree hodi diside.
“Se husu TR halo fiskalizasaun abastrata, sira sei haree depois foti desizaun konaba ida nee,” dehan nia.
Nia hatutan, durante nee manifestasaun neebe estudante sira halo publiku barak haree ona, tanba nee husik TR halo sira nia servisu, too loron ida sira bele fo sai nia rezultadu, atu publiku bele hatene.
Aleinde nee, Akademiku UNTL Rafael de Jesus tau konfiansa ba iha TR hodi halao servisu, no espera desizaun neebe sira foti labele kria konfuzaun iha sosiedade liu liu Akademiku sira.
“Espera desizaun neebe TR foti, bele justu atu labele hamosu fali polemika iha sosiedade nia leet,” dehan nia.
Jornalista: Emerenciana Pinto
Editora: Carme Ximenes
