DILI, STLTIMORLESTE.com – Jurista Sergio Dias Quintas sujere ba Ministeriu Publiku (MP) atu aselera lalais kazu roo Haksolok, tanba kazu nee iha ona MP nia liman.
“Kazu roo Haksolok sai polemika iha ita nia sosiedade, tanba nee MP nuudar titular asaun penal ita hotu enkoraza MP atu tau prioridade ba kazu roo Haksolok, atu rezolve lalais kazu roo Haksolok nee, “dehan Jurista Sergio ba STL, iha Kaikoli, Dili, Segunda (13/10/2025).
Nia dehan, bainhira rezolve se iha indisus ruma Ministeiru Publiku (MP) tenke hare investiga ona, tuir tranmitasaun prosesual neebe iha, atu akuza se maka envolve kuandu haree iha indisus ruma.
“Se prosesu roo Haksolok kontinua aguarda iha MP sei kontinua hamosu polemika, tanba prosesu iha hela MP. Espera katak Prokurador Jeral Republika servisu ho professional hodi haree prosesu nee, tanba sai polemika ba iha sosiedade,”hatete Sergio.
Sergio afirma, Governu ida tun no Governu ida sae, hanesan konsumi politiku tanba nee Ministeiru Publiku (MP) maka tenke hare didiak fo serteja atu rezolve kestaun nee, karik iha difikuldade konaba meius de provas ruma, MP tenke uza rekursu neebe iha hodi rejolve kazu nee.
Maibe kazu roo Haksolok mai ho nia natureza kompleksidade, MP servisu ho imparsial profisional bele rezolve, hanesan se iha indisus konaba krime ruma prosesu lao hodi lori too iha Tribunal.
Kuandu tama iha MP iha dalan rua deit arkiva ka akuza, maibe kona-ba kazu roo Haksolok nian tanba kazu nee kompleksu em termus de provas, liga ho difikuldade ruma MP atu hetan provas maka halo demora, MP tenke koalia iha publiku seidauk iha meius de provas esplika ba iha publiku.
Iha fatin ketak, Jurista Jose Maria Guterres dehan, Prokurador maka sei haree iha elementu ba krime ka lae.
“Prokurador nudar nain titular ba prosesu, haree prosesu nee iha duni elementu krime ka lae, kompetensia ba iha MP maka atu hare ida nee, “dehan nia.
Nia hatutan, MP maka sei hare konaba halo kontratu sira nee tuir lei aprovezionamentu ka lae, no Governu neebe maka sentraliza, tanba iha lei aprovezionamentu koalia mos ida nee.
Antes nee, Prokurador Jeral Republika, Nelson de Carvalho deklara ona katak, prosesu kona-ba roo Haksolok investigasaun kontinua lao.
Jornalista: Terezinha De Deus
Editora: Carme Ximenes
