DILI, STLTIMORLESTE.com – Jurista Timoroan konsidera julgamentu neebe halao iha Tribunal la tuir oras neebe iha, tanba Tribunal la kumpri pontualidade.
“Funsionamentu nee lao normal, maibe problema ida too agora seidauk rezolve mak kuandu Tribunal hasai notifikasaun kona-ba orariu nee, la iha pontualidade nee dezde uluk kedan iha prediu tuan iha Kolmera mos Tribunal la kumpri kona-ba pontualidade ka asuidade,” dehan Jurista Sergio Dias Quintas ba STL iha Tribunal, Dili, Kaikoli, Kuarta (05/02/2025).
Nia hatutan, iha Tribunal tuan dehan falta sala audensia mak impede halo orariu julgamentu dada oras ho demora, halo intervinente prosesual sira hein kleur.
Mezmu muda ba iha Tribunal foun iha Kaikoli maibe mantein nafatin ida nee, no kestaun seriu tenke rezolve, no orariu julgamentu bazeia ba notifikasaun Tribunal nian tuir lo-loos pontualidade. Se intervinente prosesul mai tarde fo avizu, atu Defensor no Ministeriu Publiku bele fila, labele hein kleur sem justifikasaun ida nee ladun diak.
Maibe superior sira hanesan Prezidente Tribunal Rekursu, Prokurador Jeral Republika, Defensor Publiku Jeral no Prezidente Advogadu tur hamutuk atu rezolve kona-ba pontualidade.
“Se julgamentu mak dada oras halo intervinente prosesual sira baruk, hakarak buka justisa neebe ho efisiente no efikasia maibe to ikus mai la iha, hein katak bele muda mentalidade ida nee,” dehan jurista nee.
Jurista nee afirma, kuandu julgamentu la tuir pontualidade, afeta mos ba iha prosesu pendente numeru kontinua aumenta, no dala ruma hein tiha depois julgamentu bele adia tanba parte balu la mai, tanba nee presiza hadia ba futuru atu servisu sira lao tuir oras.
Iha fatin ketak, Ministru Justisa, Sergio Hornai dehan, ajenda sira tenke lao ho efisiente no efikasia.
“Ajenda tenke iha efisiente no efikasia atu fo justisa ida neebe justu ba iha ita nia sidadaun sira, sidadaun sira notifikadu mai iha Tribunal hakarak ka lakohi sira tenke partisipa iha julgamentu,” dehan MJ, Sergio.
(ter)
