DILI, STLTIMORLESTE.com – Institutu Nasionál Kombate HIV/SIDA (INCIDA) halao sosializasaun kona-ba Vírus HIV nian ba juventude iha Suku Manleuana, nunee halo prevensaun ba Virus HIV, tanba Suku Manleuana nia futuru diak, juventude tenke saúde diak hodi dezenvolve rai ida nee ho diak liu tan.
“Juventude Suku Manleuana tenke prevene Virus HIV, tanba imi mak sei ukun rai ida nee ba oin, laos katuas ferik sira, sei imi laiha futuru, Manleuana laiha, tanba imi lori futuru nee ba oin saude tenke diak,” hatete Prezidente Institutu Nasionál Kombate HIV/SIDA (INCIDA), Daniel Marçal ba jornalista sira iha Sede Suku Manleuana, Kinta (23/10/2025).
Nia esplika, informasaun kona-ba virus HIV nee importante tebes ba juventude sira hodi labele involve seksu livre, tanba moras HIV-SIDA nee moras ida neebe perigozu tebes ba ema nia vida nomos estraga ema nia futuru.
“Ami mai iha nee atu fo hanoin ba malu deit, koalia asuntu sosial ida neebe importante teb-tebes neebe estraga ema nia vida mak Virus HIV, too agora laiha aimoruk atu halakon moras nee, tanba nee ita tenke hatene,” nia esplika.
Nia deklara, joven barak mak terus ona ba moras HIV, tanba laiha aimoruk hodi halakon moras nee, moras HIV la halo tratamentu ba SIDA tenke mate.
“Moras HIV kona ita nee ita nia hakarak, tanba dadus 2.400 nee maioria liu husi relasaun seksual arbiru,” nia koalia.
Iha fatin hanesan, Florindo da Silva Vicente, husi Gabinete Vise Primeiru Ministru e Ministru Koordenador Assuntu Sosiais hatete, Virus HIV transmite husi relasaun seksual arbiru, tanba hakarak no gostu mak obriga hodi halo relasaun seksual depois kona HIV no ikus monu ba SIDA labele kura ona tenke lakon vida.
“Vírus nee liu husi prosesu hakarak mak moras nee foin kona ita, tanba nee ami mai dezamina informasaun kona-ba Virus HIV nee ba ita hotu para idak-idak tenke halo prevensaun, liberdade ba imi nia direitu, maibe tenke kuidadu hodi uza direitu nee ho diak atu nunee labele hetan moras ida nee,” nia deklara.
Jornalista: Jeniche da Costa
Editor: Xisto Mendonça
